Qazaqstandyq opera ánshisi Marıa Mýdrák Qytaıda V. Mosarttyń «Fıgaronyń úılenýi» operasyndaǵy grafınıa Almavıva partıasyn alǵash ret oryndaıdy.
Qoıylymdar 15, 17 jáne 19 shilde kúnderi Beıjińdegi Ulttyq oryndaýshylyq óner ortalyǵynda ótedi.
Al 8–10 tamyz aralyǵynda ánshi Sıan qalasyndaǵy Grand Opera House sahnasynda óner kórsetedi.
Bul – Marıa Mýdráktyń Qytaıǵa besinshi gastróldik sapary. Buǵan deıin osy operada Súzannanyń partıasyn oryndaǵan ánshi bıyl alǵash ret grafınıa Almavıvanyń rólin somdaıdy. Bul keıipkerdiń tereń ári qarama-qaıshy sezimderi týyndyǵa erekshe dramalyq áser men emosıalyq tereńdik beredi.
Aıta keteıik, Marıa Mýdrák Qazaqstanda dúnıege kelgen. Ol bala kezinen-aq án aıtýǵa qyzyǵyp, 10 jasynan bastap Italıada vokaldan dáris alǵan. Sol jerde La Skala teatrynyń balalar horynda shyǵarmashylyq jolyn bastap, keıin Mılandaǵy Dj. Verdı atyndaǵy konservatorıany támamdady. Qazir ol álemniń jetekshi opera sahnalarynda óner kórsetip júr jáne álemdegi eń úzdik on sopranonyń biri sanalady.
Ánshiniń Qytaıǵa sapary — onyń halyqaralyq mansabyndaǵy taǵy bir mańyzdy qadam. Bul gatroldik saparda qytaılyq kórermen ónerpazdyń qaıtalanbas zor daýysy men akterlik sheberligin tamashalaı alady.
