Marhabat Baiǵut: «Atambaevtyń sózine nazar aýdarýdyń qajeti joq»
Qyrǵyzstan basshysy Almazbek Atambaevtyń aitqan ýájine qatysty Ońtústiktiń ziialy qaýym ókilderi pikir bildirip, oilaryn ortaǵa saldy. Solardyń birazyn saitymyzdyń oqyrmandarynyń nazaryna usynamyz.
Marhabat BAIǴUT, jazýshy, Qazaqstannyń eńbek sińirgen qairatkeri, halyqaralyq «Alash» jáne «Túrki álemine qyzmeti úshin» syilyqtarynyń laýreaty:
– Qyrǵyzstan Prezidenti Almazbek Atambaevtyń eldegi prezidenttik sailaýda qazaq-qyrǵyz elderiniń tatý kórshiligine syzat túsirip, aǵaiyndyq qatynastarǵa zardabyn tigizetin málimdeme jasaýy el basshysy úshin óreskel áreket boldy. Degenmen, dáýreni ótken Atambaevtyń sózine nazar aýdarýdyń qajeti joq. «Qyrǵyzstan Prezidenti Almazbek Atambaevtyń spekýliatsiialyq úndeýlerine qaramastan, Qazaqstan Respýblikasynyń úkimeti qazaq-qyrǵyz yntymaqtastyǵyn jáne strategiialyq seriktestigin belsendi túrde keńeitip, nyǵaitady", – degen Qazaqstan Úkimeti basshysynyń B.Saǵyntaevtyń oryndy pikirimen quptaimyn. Biz qyrǵyz elindegi sailaýdyń beibit jolmen, yń-shyńsyz ótkenin qalaimyz. Sailaý qorytyndysynda jeńgen kandidatpen durys qarym-qatynas ornatý, aldaǵy 15-20 jylǵa strategiialyq kókjiekterimizdi aiqyndaý, aldaǵy turǵan mindet.
Mekemtas MYRZAHMETULY, Abaitanýshy ǵalym, filologiia ǵylymdarynyń doktory, QR Memlekettik jáne halyqaralyq «Túrki álemine qyzmeti úshin» syilyqtarynyń laýreaty:
– Qyrǵyz eli – Jaratqannyń ózi o basta kórshi etip qoiǵan, Qazaqstan úshin asa mańyzdy memleketterdiń biri. Qazaqta «Kiiz satsań – kórshińe sat, bir shetinde óziń otyrasyń» degen maqal bar. Sol sebepti kórshi eldiń utylyp, ydyraýynan, búlinýinen bizge eshqandai paida joq. Eger Qyrǵyzstanda Aýǵanstandaǵydai ahýal qalyptassa, onyń zarar-zardaby bizdi de sharpityny belgili. Endeshe, qyrǵyz elindegi sailaýdyń beibit jolmen, tóńkerissiz, aiqai-shýsyz ótkenin tileiik. Jasyratyny joq, qazaq elitasy qyrǵyz aǵaiyndarǵa joǵarydan qarap, qaisybir jyldardaǵy eldegi saiasi ahýaldy "aqymaqtaý, daraqylaý baýyrlarymyzdyń tirligi» dep aiyptaýymyz, dattaýymyz qyrǵyzdyń qazaqqa degen kózqarasyn jaqsartqan joq. Sol sebepti qazaq elitasy óziniń menmendiginen arylyp, baýyrlas halyqqa degen strategiialyq kózqarastardy ón boiyna darytýy tiis.
Jeńisbek MÁÝLENQULOV, OQO Ardagerler keńesiniń tóraǵasy:
– Eki eldiń bir-birine degen peiili aq. Ókinishke qarai, Almazbek Atambaev óziniń prezidenttik dárejesine jaraspaityn, aǵat málimdeme jasady. Prezidenttik institýttyń halyqaralyq qatynastar salasyndaǵy basty fýnktsiiasy negizinen yntymaqtastyq, seriktestikti nyǵaitý, eki el arasyndaǵy dostyqqa dáneker bolý sekildi jaittardan turady. Ásirese, óz qyzmetinen ketkende basshy ózinen keiingi el basqaratyn tulǵalar úshin jaqsy jaǵdai jasap ketýi kerek, eki kórshiles memlekettiń dostyq baǵytynan ajyramaýyna septesýi kerek. Al, Atambaevtyń áreketi buǵan qarama-qaishy bolyp otyr. Degenmen, bul málimdemeniń shyndyqqa sáikes kelmeitinin eki eldiń halqy da bilip otyr. Halyqaralyq qaýymdastyq ta Qazaqstannyń jetken jetistikterin moiyndaidy. Biyl 1 jeltoqsannan bastap Qyrǵyzstandy basqa adam basqarady. Jáne de qazaq-qyrǵyz qarym-qatynasy retke keledi dep oilaimyn.
Ábilqasym DOSBOLOV, Ońtústik Qazaqstan oblystyq máslihatynyń depýtaty:
– Sailaýda óz kandidatynyń jeńilip qalýy múmkin ekenin sezgen Atambaev eń kórgensiz áreketterge bara bastady. Kórshi memlekettiń ishki isine aralasyp, tutas el men onyń basshysyna negizsiz aiyp taǵyp, qara kúie jaǵý áreketi diplomatiiada jol berýge bolmaityn kórgensizdik. Qazaqstanda halyqtyń áleýmettik jaǵdaiy jyldan jylǵa jaqsaryp kele jatqanyn búkil dúniejúzi kórip, bilip otyr. Sondyqtan Atambaevtyń zeinetaqy men tarifterge qatysty aitqandary shyndyqqa sáikes kelmeidi. Degenmen, bul málimdemege qatysty elimizdiń Syrtqy ister ministrligi resmi túrde laiyqty jaýap berdi. Olai bolsa, bir saiasatkerdiń jańsaq pikiri úshin búkil qyrǵyz halqyn aiyptaýǵa bolmaidy. Eki el arasyndaǵy dostyq pen ekonomikalyq yntymaqtastyqty saqtap qalýǵa tiispiz.
