Marqum Saltanat Núkenovanyń aǵasy Aitbek Amangeldi sotta qaryndasynyń soqqyǵa jyǵylǵan sýretin kórsetti, - dep habarlaidy Dalanews.kz.
Búgin burynǵy ulttyq ekonomika ministri Qýandyq Bishimbaevqa qatysty sot otyrysy ótip jatyr. Sot otyrysy jábirlenýshi taraptan jaýap alýdan bastaldy. Saltanat Núkenovanyń aǵasy Aitbek Amangeldi sotta sóz sóiledi.
"Saltanatty 8 naýryzda quttyqtaýǵa barǵanda kórdim. Tús ýaqytynda barǵan edim. Oǵan bir qushaq gúl syiladym. Ol úide edi. Onyń bet-álpeti qatty sharshańqy kórinip turdy, kóziniń asty qaraiyp ketken. "Saltanat, nege sharshap tursyń?" dedim. "Qýandyq túnimen uiqy bermedi, túnimen sóilesip shyqtyq, al tań atpastan balgerge barýǵa májbúrledi" dedi", - deidi ol.
Sonymen qatar, ol birneshe kúnnen keiin qaryndasy soqqyǵa jyǵylǵan sýretin jibergenin jetkizdi.
"20 naýryzda jumystaǵy qyzmetkerler úshin timbilding uiymdastyrdyq. Sol kúni úige 12-lerde keldim. Telefonyma kóp qońyraý men hat kelgen.
Telefonymdy ashsam, myna sýretti kórdim. Men bul sýretterdi Saltanattan aldym. Ony keshki 22.00 shamasynda jiberdi... Bul sýretterde soqqynyń izderi kórinip tur. Meniń oiymsha, betinen judyryqpen urǵan.
Saltanat úshin, onyń jaǵdaiy úshin qoryqtym. Oǵan birden habarlastym. Tún ýaqyty edi, telefonyn almady. Ýaiymdap, Qýandyqqa habarlastym, Qýandyq aldy", - dedi Aitbek Amangeldi.
Aitbek Amangeldiniń sózinshe, Qýandyqtan mán-jaidy suraǵanda, úiine sóilesýge shaqyrǵan. Al keiin Qýandyq bul otbasylyq máseleleri ekenin, Saltanat qaida ekenin bilmeitinin aitqan.
Marqumnyń aǵasynyń sózinshe, Saltanat otbasyn saqtap qalýǵa tyrysqan.
"Oǵan zattaryńdy jina, ketemiz, úige baramyz, munyń saǵan qajeti qansha?" dedim. Ol eresek adam ekenin, bul óziniń ómiri, otbasy ekenin, minsiz bolmasa da otbasyn saqtaýǵa tyrysatynyn jáne Qýandyqty jaqsy kóretinin aitty. "Men oǵan "túsinip tursyń ba, mynadai soqqymen seni óltirip tynady" dedim. Ol qalatynyn aitty", - dedi Aitbek Amangeldi.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdaldy. Alqabiler alqasyna 12 adam irikteldi: 10 – negizgi quram, 2 – qosalqy. Keiin Qýandyq Bishimbaev sotta Saltanat Núkenovany asa qatygezdikpen óltirgenin moiyndamady.
