مارقۇم سالتانات نۇكەنوۆانىڭ اعاسى ايتبەك امانگەلدى سوتتا قارىنداسىنىڭ سوققىعا جىعىلعان سۋرەتىن كورسەتتى، - دەپ حابارلايدى Dalanews.kz.

بۇگىن بۇرىنعى ۇلتتىق ەكونوميكا ءمينيسترى قۋاندىق بيشىمبايەۆقا قاتىستى سوت وتىرىسى ءوتىپ جاتىر. سوت وتىرىسى جابىرلەنۋشى تاراپتان جاۋاپ الۋدان باستالدى. سالتانات نۇكەنوۆانىڭ اعاسى ايتبەك امانگەلدى سوتتا ءسوز سويلەدى.

"سالتاناتتى 8 ناۋرىزدا قۇتتىقتاۋعا بارعاندا كوردىم. ءتۇس ۋاقىتىندا بارعان ەدىم. وعان ءبىر قۇشاق گۇل سىيلادىم. ول ۇيدە ەدى. ونىڭ بەت-الپەتى قاتتى شارشاڭقى كورىنىپ تۇردى، كوزىنىڭ استى قارايىپ كەتكەن. "سالتانات، نەگە شارشاپ تۇرسىڭ؟" دەدىم. "قۋاندىق تۇنىمەن ۇيقى بەرمەدى، تۇنىمەن سويلەسىپ شىقتىق، ال تاڭ اتپاستان بالگەرگە بارۋعا ماجبۇرلەدى" دەدى"، - دەيدى ول.

سونىمەن قاتار، ول بىرنەشە كۇننەن كەيىن قارىنداسى سوققىعا جىعىلعان سۋرەتىن جىبەرگەنىن جەتكىزدى.

"20 ناۋرىزدا جۇمىستاعى قىزمەتكەرلەر ءۇشىن تيمبيلدينگ ۇيىمداستىردىق. سول كۇنى ۇيگە 12-لەردە كەلدىم. تەلەفونىما كوپ قوڭىراۋ مەن حات كەلگەن.

تەلەفونىمدى اشسام، مىنا سۋرەتتى كوردىم. مەن بۇل سۋرەتتەردى سالتاناتتان الدىم. ونى كەشكى 22.00 شاماسىندا جىبەردى... بۇل سۋرەتتەردە سوققىنىڭ ىزدەرى كورىنىپ تۇر. مەنىڭ ويىمشا، بەتىنەن جۇدىرىقپەن ۇرعان.

سالتانات ءۇشىن، ونىڭ جاعدايى ءۇشىن قورىقتىم. وعان بىردەن حابارلاستىم. ءتۇن ۋاقىتى ەدى، تەلەفونىن المادى. ۋايىمداپ، قۋاندىققا حابارلاستىم، قۋاندىق الدى"، - دەدى ايتبەك امانگەلدى.

ايتبەك امانگەلدىنىڭ سوزىنشە، قۋاندىقتان ءمان-جايدى سۇراعاندا، ۇيىنە سويلەسۋگە شاقىرعان. ال كەيىن قۋاندىق بۇل وتباسىلىق ماسەلەلەرى ەكەنىن، سالتانات قايدا ەكەنىن بىلمەيتىنىن ايتقان.

مارقۇمنىڭ اعاسىنىڭ سوزىنشە، سالتانات وتباسىن ساقتاپ قالۋعا تىرىسقان.

"وعان زاتتارىڭدى جينا، كەتەمىز، ۇيگە بارامىز، مۇنىڭ ساعان قاجەتى قانشا؟" دەدىم. ول ەرەسەك ادام ەكەنىن، بۇل ءوزىنىڭ ءومىرى، وتباسى ەكەنىن، ءمىنسىز بولماسا دا وتباسىن ساقتاۋعا تىرىساتىنىن جانە قۋاندىقتى جاقسى كورەتىنىن ايتتى. "مەن وعان "ءتۇسىنىپ تۇرسىڭ با، مىناداي سوققىمەن سەنى ءولتىرىپ تىنادى" دەدىم. ول قالاتىنىن ايتتى"، - دەدى ايتبەك امانگەلدى.

ايتا كەتەيىك، 27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. كەيىن قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى.