Quqyq qorǵaýshy, «Ar.Rýh.Haq» qoǵamdyq qorynyń basshysy Baqytjan Tóreǵojina marafonshy Marat Jylanbaevtyń izoliatorda túsirilgen videosyn jariialap, onyń densaýlyǵyna alańdap otyrǵanyn aitty, dep habarlaidy Dalanews.kz.
Videony ol ózine qatysty ákimshilik is aiasynda politsiiadan alǵan.
Tóreǵojina videony kórgen soń, Jylanbaevtyń jaǵdaiynyń tym aýyr ekenin málimdedi.
«Marattyń júzine qarańyzdarshy! Aryqtaǵany sonshalyq – tek jaq súiegi ǵana kórinip tur! Biliktiń onyń betin nege kórsetpei otyrǵany túsinikti!» – dep jazdy Tóreǵojina.
Videoda marafonshy tańǵy jattyǵý jasap jatqanymen, quqyq qorǵaýshy onyń denesi ábden álsiregenin baiqap otyr.
«Marat turyp jattyǵý jasaǵanymen, teńselip ketedi. Terisi men súiegi ǵana qaldy deýge bolady. Bul – onyń ashtyqtan qatty álsiregeniniń aiǵaǵy», – deidi Tóreǵojina.
Sondai-aq quqyq qorǵaýshy Jylanbaevtyń jattyǵý jasap jatqanyna qarap, onyń densaýlyǵy jaqsy deýge bolmaitynyn atap ótti.
«Marat – kásibi sportshy. Búgin onyń ashtyq jariialaǵanyna 56 kún boldy. Jattyǵý jasap jatqany – jaǵdaiynyń jaqsy ekenin bildirmeidi. Kóptegen sportshy, tipti arbaǵa tańylǵan kúnniń ózinde de jattyǵý jasaýdy jalǵastyra beredi», – dep jazdy quqyq qorǵaýshy.
