Shyǵys Qazaqstan oblysy Kúrshim aýdanyndaǵy Maraldy aýylynyń mańaiyndaǵy altyn óndirý fabrikasy úshin altyn ken ornyna ekologiialyq ruqsat alyndy.
9 sáýirde «GRK «Maralicha» JShS-i Kúrshim aýdanyndaǵy Maralihinskoe ken ornynda ónimdiligi jylyna 250 myń tonna altyn kenderin óndirýge qorshaǵan ortaǵa áserine ekologiialyq ruqsatyn aldy.
Ken Maraldy aýylynyń mańyndaǵy altyn óndirý fabrikasynyń shikizaty bolyp tabylady. Bul sheshimniń aldynda kompaniialar toby boiynsha birqatar qoǵamdyq tyńdaýlar ótkizilip, onda ken ornynyń yqtimal áseri jan-jaqty qarastyryldy.
Ekologiia, ónerkásip, gidrogeologiia, tabiǵatty paidalaný jáne jer qatynastary salalarynyń mamandary saraptamalyq qorytyndylaryn berdi. Olardyń barlyǵy qorshaǵan ortany qorǵaý sharalaryn saqtai otyryp, jer qoinaýy ýchaskesinde ken óndirýge ruqsat etilgenin rastady. Kompaniialar toby jaqyn arada olardy júzege asyrýǵa kirisedi.
Bul jobanyń shekaralas aýdannyń damýyna úlken serpin bereri anyq. Jalpy, kez kelgen investitsiialyq joba – eń aldymen qosymsha salyq ákeletin kóz, qosymsha jumys oryndary, óńirdiń órkendeý kózi.
Altyn óndirý fabrikasynyń qurylysy biznesti kóleńkeli ekonomikadan shyǵaryp qana qoimai, Maraldy aýylynyń turǵyndaryna da áleýmettik kepildikter beredi. Buǵan deiin «MARALICHA» taý-ken kompaniiasy» JShS atqarýshy direktory Marat Asaýbaev kompaniia Maraldy aýylyndaǵy joldardy jóndeýge mindettenetinin aitqan bolatyn.
– Sondai-aq biz Qoitastaǵy kópirdi qaita jańartýdy, jergilikti mektepti materialdyq-tehnikalyq jaraqtandyrýǵa qarajat bólýdi, aýyldyq okrýg túlekterin joǵary oqý oryndary men kolledjderde oqytýdy josparlap otyrmyz, – degen Marat Asaýbaev tyńdaýlardyń birinde.
Kásiporyn óz moinyna alatyn áleýmettik mindettemelerdiń qatarynda meditsinalyq obektilerdi jóndeý, múgedekterge turǵyn úi alyp berý bar.
Kásiporyn qyzmetiniń zańdylyǵyn aimaq biligi jiti qadaǵalaityn bolady. Jergilikti bilik, oblys basshylyǵy árdaiym qoldanystaǵy zańnama talaptarynyń qatań saqtalýyn, ekologiialyq qaýipsizdikti qamtamasyz etedi jáne halyqtyń múddesin basty nazarda ustaidy.
Esterińizge sala ketsek, zaýyt qurylysyna 2022 jylǵy 26 shildede ShQO boiynsha ekologiia departamenti ruqsat bergen. Ol ruqsattyń merzimi 2022 jyldyń 31 jeltoqsanynda aiaqtaldy. Birqatar sebeptermen zaýyt qurylysy ýaqytynda aiaqtalmady. Osyǵan bailanysty kásiporynǵa jańa ekologiialyq ruqsat alý qajet edi. «Maraliha» jáne «Maraliha ken alqaby» ken oryndaryndaǵy ónimdiligi jylyna 250 myń tonna kendi óńdeý fabrikasy birinshi sanattaǵy obekt bolyp tabylady.
