Jıynda birinshi bolsyp sóz alǵan «Qazsýshar» RMK Maqtaaral bólimshesiniń basshysy Sh.Omarov keń kólemde baıandama jasady.
– Maqtaaral aýdany aýmaǵynan ótetin «Dostyq» magıstraldy kanalynan aǵyndy sýlardy negizgi kanaldardyń gıdrotehnıkalyq ımarattar arqyly apatsyz ótkizý, sý sharýashylyǵy ımarattarynda apatty jaǵdaılardyń aldyn alý is-sharalary júrgizilýde. «Dostyq» kanaly bóliginen aǵyn sýlardy apatsyz jáne qaýipsiz ótkizý, sý basý qaýpi múmkin eldi mekender aýmaǵynda, sý sharýashylyǵy nysandarynda olardyń aldyn alý úshin baqylaý beketterin uıymdastyrý boıynsha jaýapty mamandar bekitilip, kezekshilik uıymdastyrylýda. Kanaldyń óndiristik shtatynda 56 adam qyzmet atqaryp, 4 bólimde dıspecherlik kezekshilik júrgizilýde. Bıylǵy jylǵa «Dostyq» kanalyna respýblıkalyq búdjetten qurylys jóndeý jumystaryna 38 mln. teńge jumsalyp, 24,5 shaqyrym sý arnalary mehanıkalyq tazalaýdan ótip, gıdrotehnıkalyq qurylymdar men dambalar jóndeýden ótkizildi, – dedi Sh.Omarov.
Jıyn barysynda sóz alǵan aýyl sharýashylyǵy bóliminiń basshysy Ý.Myrzamdanov egistik alqaptardy qysqy sor shaıý kezeńinde sharýalar eskerýi tıis arnaıy erejelerdi atap ótti. Onyń aıtýynsha egistik alqaptardy sor shaıý kezeńinde pal alýdy durys uıymdastyryp, sýdyń berilý mólsherin qatań qadaǵalasa – eshqandaı olqylyq oryn almaıdy eken.
Májilisti qorytyndylaǵan aýdan ákiminiń orynbasary B.Tórebekov sý tasqyny jaǵdaıynyń aldyn alý boıynsha jumystardy toqtatpaý kerektigin aıtyp, tıisti mekeme basshylaryna naqty tapsyrmalar berdi.
Aıta keteıik, Maqtaaral aýdanynda qys-kóktem aılaryndaǵy sý tasqyny jaǵdaıyna qarsy tıisti apattyq materıaldar qory qurylǵan. Sý sharýashylyǵy nysandarynyń tehnıkalyq jaı kúıine, sý arnalarynyń jaǵdaıyna zertteýler júrgizilip, tıisti jumystar jasalǵan.
Maqtaaral aýdany ákiminiń baspasóz qyzmeti
