Maqtaaralda «Nurly jol» kitabynyń tusaýkeseri ótti
Elbasymyz N.Á.Nazarbaev «Bolashaqqa baǵdar: rýhani jańǵyrý» maqalasynda «Árbir ólkeniń el esinde saqtalǵan birtýar perzentteri bar. Onyń bárin jas urpaq bilip ósýge tiis» - degen bolatyn. Mine, Maqtaaral aýdanynyń osyndai birtýar perzenti O.Nurjanov týraly jazylǵan kitaptyń tusaýkeserine aýdan ákimi arnaiy qatysyp, sóz sóiledi.
«Kitap degenimiz – aldyńǵy urpaqtyń artqy urpaqqa qaldyrǵan rýhani ósieti», - degen eken kórnekti jazýshy Ǵabit Músirepov. Mine, búgin barlyq ákimderdiń jumys ústelinde turýy tiis tamasha kitap jaryqqa shyqty. Siz bul kitapty paraqtai otyryp baqyt pen jetistiktiń barlyǵy eńbekpen keletinin túsinesiz. Kitapta Omarbek aǵamyzdyń eńbek jyldaryndaǵy tájiribeleri men ómirindegi sheshýshi sátter tamasha jazylǵan. Ásirese, ol kisiniń aýdan ákimi bolyp eńbek etken kezderindegi oqiǵalar maǵan erekshe áser etti. Kóshbasshylyq – Allannyń adamǵa bergen syiy. Omarbek aǵamyzdyń boiynda bul qasiet bala kezinen bar. Ózine tapsyrylǵan mindetti jaýapkershilikpen jáne sońyna deiin oryndaýdyń arqasynda úlken jetistikterge jetti. Sondai-aq, ol kisiniń adamdarmen til tabysýy, aýditoriiany baýrap alýy – kóptegen ákimderde kezdese bermeitin erekshe qabilet. Sondyqtan bolar, búgingi el basqaryp júrgen kóptegen azamattar Omekeńdi ózine ustaz sanaidy. Sonyń biri – menmin!» - dedi Baqyt Násirhanuly.
Jiynda aýdanymyzdyń qurmetti azamaty Q.Hametov, kitap avtorynyń biri J.Tileýuly, aýdanymyzdyń depýtaty I.Úmbetaev siiaqty O.Nurjanovpen zamandas, qyzmettes bolǵan azamattar sóz sóilep, estelikterimen bólisti. Sondai-aq, aýdan ákimi 70 jasqa tolyp otyrǵan O.Nurjanovtyń ústine shapan japty.
Aita keteiik, eńbek jolyn Maqtaly kásiptik-tehnikalyq ýchilishesinde muǵalim bolyp bastaǵan O.Nurjanov túrli jyldary partiia komitetinde jumys atqardy. Táýelsizdik jyldary birneshe savhozdyń direktory boldy. 1997 jyldan bastap irilengen Maqtaaral aýdanynyń ákimi, 1999 jyly irilengen Saryaǵash aýdanynyń ákimi qyzmetterin abyroimen atqardy. Osylaisha 2002 jyly qaitadan Maqtaaral aýdanynyń ákimi bolyp, maqtaly ólkeni 6 jyl basqardy. Osy jyldary Myrzashól óńiri gúldenip, damýdyń dańǵyl jolyna túskeni belgili.
Elge qyzmet etýdi ózine mindet sanaityn tulǵa odan keiin de qarap qalmady. Qazaqstan Respýblikasynyń Ózbekstandaǵy elshiliginiń hatshysy, Maqtaaral aýdandyq máslihatynyń depýtaty, máslihattyń hatshysy laýazymdary boiynsha eńbek etti.
Maqtaaral aýdany ákiminiń baspasóz qyzmeti
