Maqsat Iliiasuly kóptegen zańdy ózgertý kerek ekenin aitty
Zańger sózin jer reformasy jónidegi komissiianyń quqyqtyq mártebesinen bastady.
«Komissiianyń zańdyq-quqyqtyq mártebesi anyqtalǵan joq. Aqyrǵy sheshimi qalai bolatynyn, ol qandai jolmen qabyldanatynyn bilmeimiz. Komissiia daý týǵyzǵan zańnyń ózgerýine yqpal ete me? Biz parlament janyndaǵy jumys komissiiasyna múshe bola alamyz ba degen kóptegen suraqtar bar.
Osyǵan orai, «Alash joly» qozǵalysy atynan birqatar usynystarymyz bar. Jer daýynyń basy 5 institýtsionaldy reformadan bastaldy. Soǵan sai, jer kodeksine tolyqtyrýlar endi. Sol reformany júzege asyrý jónindegi komissiianyń tóraǵasy bolyp premer-ministr bekitildi. Myna jer reformasy jónindegi komissiia da premer-ministrdiń ókimimen qurylyp otyr. Bul óz kezeginde komissiianyń jumysynyń tiimdiligine kepildik bere almaidy. Óitkeni, úkimet jer satý jónindegi óz ustanymynan qaitady dep oilamaimyz. «Alash joly» jerdiń sheteldikterge de, el azamattaryna da jalǵa berýge, qazaqstandyqtarǵa satýǵa qarsy», - degen zańger komissiia jumysy barysynda basqa da birqatar zańdarǵa ózgeris engizý máselesin kóterý kerektigin aitty.
«Jer kodeksine, «Neke jáne otbasy» kodeksine, kóshi-qon týraly, taǵy basqa zańdarǵa ózgeris engizý qajet. Ondai jumys atqarý úshin bul jer reformasy jónindegi komissiia parlament janynan qurylý kerek», - deidi Maqsat Iliiasuly.
Ol sondai-aq, komissiia quramyna Jarylqap Qalybai, Qurmanǵazy Rahmetov, Jasaral Qýanyshálin, Ýálihan Qaisar, t.b. azamattardy qosý týraly usynys aityp, «Eýraziia» arnasy bastaǵan birqatar aqparat quraldary jer taǵdyryna alańdaǵan halyqty kelemejdedi dep aiyptady. Sonymen qatar, m. Iliiasuly osy ýaqytqa deiin ótken mitingterge qatysqan azamattardy qýdalaýdy toqtatýdy da talap etti.
