Mańǵystaý oblysynda jumys ýaqytynda jumys ornynda qaza tapqan kúzetshiniń isine qatysty sot sheshimi shyqty. Sot arnaiy tergeý komissiiasynyń qorytyndysyn negizsiz dep tanyp, talap aryzdy tolyq qanaǵattandyrdy, dep habarlaidy dalanews.kz.
Is Mańǵystaý oblysynyń mamandandyrylǵan aýdanaralyq ákimshilik sotynda qaralǵan.
Sotta anyqtalǵandai, P. kúzet agenttigimen eńbek sharty boiynsha jumys istegen. 2025 jylǵy 8 qyrkúiekte saǵat 20:00-de ol Mańǵystaý oblystyq AITV infektsiiasynyń aldyn alý ortalyǵyndaǵy kúzet beketine kezekshilikke túsken.
Kelesi kúni túngi saǵat 01:00 shamasynda esirtkige mas kúidegi belgisiz adam metall qorshaýdan asyp, qan alý pýnktine kirgen. Dybysty estigen P. sol jerge barǵan kezde oǵan metall zatpen shabýyl jasalyp, denesiniń ártúrli bólikterine birneshe ret soqqy jasalǵan. Kúzetshi Mańǵystaý oblystyq aýrýhanasyna jetkizilgenimen, alǵan jaraqattarynan qaitys bolǵan.
Oqiǵadan keiin arnaiy tergeý komissiiasy qurylyp, onyń qorytyndysynda bul jaǵdai eńbek qyzmetine bailanysty jazataiym oqiǵa bolyp tabylmaityny kórsetilgen.
Alaida sot komissiianyń bul tujyrymyn negizsiz dep tanydy.
Sottyń málimetinshe, oqiǵa P.-nyń jumys ýaqytynda ári jumys berýshi jibergen jumys ornynda bolǵan. Sonymen qatar arnaiy tergeý barysynda qan alý ortalyǵyndaǵy beinejazbalar suratylmaǵan, qylmystyq is materialdary zerttelmegen jáne jaýapty uiym qyzmetkerlerinen túsinikteme alynbaǵan.
Sondai-aq komissiia quramyna zań talaptaryna sáikes AITV infektsiiasynyń aldyn alý ortalyǵy men kúzet agenttiginiń ókilderi engizilmegen.
Sot tergeý formaldy júrgizilip, oqiǵanyń barlyq sebepteri men mán-jailary tolyq ári obektivti anyqtalmaǵan degen qorytyndyǵa keldi.
Osyǵan bailanysty K.-nyń talap aryzy tolyq qanaǵattandyrylyp, arnaiy tergeý aktisi zańsyz dep tanyldy jáne arnaiy tergeý júrgizý mindeti júkteldi.
Sot sheshimi ázirge zańdy kúshine engen joq.
