Mańǵystaý oblysynda úi jaǵdaiynda ystalǵan balyq jegen bir otbasy aýyr hálde jansaqtaý bólimine tústi, dep habarlaidy dalanews.kz 24KZ-ke siltep.
Aldyn ala boljam boiynsha ýlanýǵa úi jaǵdaiynda daiyndalyp, tońazytqyshta uzaq ýaqyt saqtalǵan úidiń ystalǵan balyǵy sebep bolǵan. Zardap shekkender bul ónimdi 17 qyrkúiekte keshki saǵat 20:00-21:00 aralyǵynda jegen. Aýrýdyń alǵashqy belgileri 18 qyrkúiekte keshke baiqalyp, naýqastar meditsinalyq kómekke 19 qyrkúiekte ǵana júgingen.
Óńirlik densaýlyq saqtaý basqarmasynyń shtattan tys epidemiology Maral Qadyrdyń málimetinshe, botýlizm belgilerimen úsh eresek pen bir bala aýrýhanaǵa jetkizilgen. Aýrýhanaǵa túsken kezde olardyń jaǵdaiy aýyr dep baǵalanǵan.
"Naýqastarda álsizdik, bas ainalý, jutyný men kórý qabileti nasharlaýy, tamaq qurǵaýy, kóz buldyraýy jáne esten taný belgileri baiqaldy", - dedi Maral Qadyr.
Mamandardyń aitýynsha, zardap shekkenderdiń jaǵdaiy aýyr, qazir olar ókpeni jasandy jeldetý apparatyna qosylǵan.
