Búgin, 19 jeltoqsanda óńir basshysy Nurdáýlet Qilybai Aqtaý qalasynda ornalasqan oblystyq sporttaǵy daryndy balalarǵa arnalǵan mamandandyrylǵan mektep-internat kolledjiniń ashylý saltanatyna qatysty, dep habarlaidy Dalanews.kz.
Bul – óńirde alǵash ret ashylyp otyrǵan, sport pen bilimdi ushtastyratyn arnaiy oqý orny. Mekeme olimpiadalyq sport túrleri boiynsha daryndy balalardy kásibi deńgeide daiarlaýǵa baǵyttalǵan.
Saltanatty sharada oblys ákimi bul oqý orny óńirdiń sporttyq áleýetin arttyrýǵa jáne halyqaralyq deńgeide el namysyn qorǵaityn chempiondardy tárbieleýge zor múmkindik beretinin atap ótti.
«Bul mektep Memleket basshysynyń sportty damytý jáne daryndy balalardy qoldaý jónindegi tapsyrmasyna sáikes ashylyp otyr. Munda sport pen bilim qatar damyp, bolashaq chempiondardy daiarlaýǵa barlyq jaǵdai jasalǵan. Endigi mindet – oqý protsesin sapaly uiymdastyryp, balalardyń qaýipsizdigi men kásibi damýyn qamtamasyz etý. Bul jerden el namysyn halyqaralyq arenalarda qorǵaityn sportshylar ósip shyǵaryna senemin», – dedi Nurdáýlet Qilybai.
Internat 300 oqýshyǵa arnalǵan. Onyń ishinde 250 bala jataqhanamen qamtamasyz etilse, qatynap oqityn 50 oqýshy úshin arnaiy tasymal qyzmeti uiymdastyrylǵan.
Oqý ornynda boks, dziýdo, taekvondo, erkin jáne grek-rim kúresi boiynsha jattyǵýlar ótkiziledi. Oqýshylar kún saiyn eki mezgil jattyǵyp, tájiribeli jattyqtyrýshylardyń jetekshiligimen daiyndyqtan ótedi.
Internat-kolledjdiń infraqurylymy zamanaýi talaptarǵa sáikes jabdyqtalǵan. Munda sport jáne kúres zaldary, oqý kabinetteri, kitaphana, meditsinalyq ortalyq, jataqhana men ashana qarastyrylǵan. Oqý men jattyqtyrý jumystary memlekettik bilim standarttary men sporttyq talaptarǵa sai júzege asyrylady.
Mańǵystaýlyq jas sportshylar Memleket basshysy Qasym-Jomart Toqaevqa sporttyq internattyń ashylýyna kórsetken qoldaýy úshin alǵystaryn bildirip, Prezidenttiń úmitin aqtaitynyn aityp, el namysyn qorǵap, Qazaqstannyń kók bairaǵyn biikke kóterýge ýáde berdi.
