Eske sala keteiik, Memleket basshysy 2021 jyldyń qyrkúiek aiyndaǵy óńirge sapary barysynda ótkizgen jiynda Úkimet pen Mańǵystaý oblysy ákimdigi radioaktivti qaldyqtar qoimasyn 3 jyl ishinde tolyqtai rekýltivatsiialaý jumystaryn aiaqtaýdy tapsyrǵan bolatyn. Budan beri bir jyl ótti.
Qazirgi tańda «Qoshqar ata» qaldyq qoimasynda 200 gektar jerdi qaita qalpyna keltirý jumystary júrgizildi. Sondai-aq, topyraq tógý jáne qara sekseýil egý jumystary da qarqyndy júrgizilýde.
– 2021 jyly 266,2 gektar jerge rekýltivatsiialaý jumysy júrgizilgen bolatyn. Osy jyldyń sońyna deiin 335,9 gektar jerge qaita qalpyna keltirý jumystaryn iske asyrý josparlanǵan. Al 2023-2024 jyldary 1008,1 gektar jerge rekýltivatsiialaý jumystary júrgiziletin bolady, – deidi Mańǵystaý oblysy tabiǵi resýrstar jáne tabiǵat paidalanýdy retteý basqarma basshysynyń orynbasary Esenqos Ádilbaev.
Qazir «Qoshqar ata» qaldyq qoimasynda qalpyna keltirý jumystary josparǵa sáikes júrgizilip jatyr. 88,2 gektar jerge qara seseýil otyrǵyzylǵan.
Ol ádette qumdy daýyldardan qorǵaý úshin otyrǵyzylady. Mańǵystaýda sekseýil 2016 jyly otyrǵyzyla bastady. Qazirgi tańda Mańǵystaý aýdanynyń úsh aýyly – Úshtaǵan, Tushyqudyq, Shebir mańynda 451,8 gektar alqapta sekseýilden jasyl oazis qalyptasqan.
Al 2022 jyldyń sońyna deiin mundai aǵashtardy Senek aýylynyń ainalasyna otyrǵyzý josparlanǵan.
Sonymen qatar, «Qoshqar ata» qaldyq qoimasynyń ainalasynda da sekseýilden jasyl qorǵanys aimaǵyn qurý josparlanýda. Bul jumys 2025 jyldyń sońyna deiin jasalatyn bolady.
https://www.youtube.com/watch?v=QbKRx9n3l6Q
