ەسكە سالا كەتەيىك، مەملەكەت باسشىسى 2021 جىلدىڭ قىركۇيەك ايىنداعى وڭىرگە ساپارى بارىسىندا وتكىزگەن جيىندا ۇكىمەت پەن ماڭعىستاۋ وبلىسى اكىمدىگى راديواكتيۆتى قالدىقتار قويماسىن 3 جىل ىشىندە تولىقتاي رەكۋلتيۆاسيالاۋ جۇمىستارىن اياقتاۋدى تاپسىرعان بولاتىن. بۇدان بەرى ءبىر جىل ءوتتى.
قازىرگى تاڭدا «قوشقار اتا» قالدىق قويماسىندا 200 گەكتار جەردى قايتا قالپىنا كەلتىرۋ جۇمىستارى جۇرگىزىلدى. سونداي-اق، توپىراق توگۋ جانە قارا سەكسەۋىل ەگۋ جۇمىستارى دا قارقىندى جۇرگىزىلۋدە.
– 2021 جىلى 266،2 گەكتار جەرگە رەكۋلتيۆاسيالاۋ جۇمىسى جۇرگىزىلگەن بولاتىن. وسى جىلدىڭ سوڭىنا دەيىن 335،9 گەكتار جەرگە قايتا قالپىنا كەلتىرۋ جۇمىستارىن ىسكە اسىرۋ جوسپارلانعان. ال 2023-2024 جىلدارى 1008،1 گەكتار جەرگە رەكۋلتيۆاسيالاۋ جۇمىستارى جۇرگىزىلەتىن بولادى، – دەيدى ماڭعىستاۋ وبلىسى تابيعي رەسۋرستار جانە تابيعات پايدالانۋدى رەتتەۋ باسقارما باسشىسىنىڭ ورىنباسارى ەسەنقوس ادىلبايەۆ.
ءقازىر «قوشقار اتا» قالدىق قويماسىندا قالپىنا كەلتىرۋ جۇمىستارى جوسپارعا سايكەس جۇرگىزىلىپ جاتىر. 88،2 گەكتار جەرگە قارا سەسەۋىل وتىرعىزىلعان.
ايتا كەتەيىك، قارا سەكسەۋىل – ماڭعىستاۋدىڭ قاتال كليماتىنا توتەپ بەرەتىن، تەز تامىر جايىپ وسەتىن، قۇمدى ۇستاپ تۇراتىن قاسيەتى بار جەرگىلىكتى فلورادا كەزدەستىن اعاش.
ول ادەتتە قۇمدى داۋىلداردان قورعاۋ ءۇشىن وتىرعىزىلادى. ماڭعىستاۋدا سەكسەۋىل 2016 جىلى وتىرعىزىلا باستادى. قازىرگى تاڭدا ماڭعىستاۋ اۋدانىنىڭ ءۇش اۋىلى – ءۇشتاعان، تۇششىقۇدىق، شەبىر ماڭىندا 451،8 گەكتار القاپتا سەكسەۋىلدەن جاسىل وازيس قالىپتاسقان.
ال 2022 جىلدىڭ سوڭىنا دەيىن مۇنداي اعاشتاردى سەنەك اۋىلىنىڭ اينالاسىنا وتىرعىزۋ جوسپارلانعان.
سونىمەن قاتار، «قوشقار اتا» قالدىق قويماسىنىڭ اينالاسىندا دا سەكسەۋىلدەن جاسىل قورعانىس ايماعىن قۇرۋ جوسپارلانۋدا. بۇل جۇمىس 2025 جىلدىڭ سوڭىنا دەيىن جاسالاتىن بولادى.
https://www.youtube.com/watch؟v=QbKRx9n3l6Q
