Mándibektiń jazǵany jalǵan – Máminniń baspasóz qyzmeti
Úkimet músheleri bolyp jatqan jaǵdaidyń bárin bylai túsindiredi:
Qazaqstandyq memlekettik BAQ-tyń burynǵy jýrnalisti áleýmettik jelilerde taratqan Úkimet músheleriniń ushý sharttary men olardy tasymaldaý qyzmetteriniń quny týraly aqparat shyndyqqa janaspaidy.
Ol jyl saiyn Premer-Ministr men onyń orynbasarlarynyń, sondai-aq QR Parlamenti Senaty men Májilisi tóraǵalarynyń ushaqpen ushýlaryna 15-20 mlrd teńge kóleminde respýblikalyq biýdjetten qarajat jumsalady dep jazdy.
Is júzinde 2021 jylǵa QR Premer-Ministri men Premer-Ministrdiń orynbasarlary bastaǵan qazaqstandyq delegatsiialardyń asa mańyzdy ushý saparlaryn (literlik reisterdi) júzege asyrýǵa 578 mln teńge mólsherinde shyǵys qarajaty qarastyrylǵan.
Kórsetilgen soma 2021 jyly kólik qyzmetterin qamtamasyz etýge eseptelgen. Bul rette tólem qazaqstandyq delegatsiialardyń oryndalǵan naqty óńirlik jáne halyqaralyq ushý jaǵdailary boiynsha tólenedi. Mysaly, 2020 jyly osy maqsatqa 578 mln teńge qarastyrylsa, is júzinde 275,6 mln teńgege jumsaldy.
Premer-Ministr men Premer-Ministrdiń orynbasarlarynda tek olarǵa bekitilgen jeke ushaqtar joq.
Ushaq arqyly júzege asyrylatyn saparlar elimizdiń áleýmettik-ekonomikalyq damý máselelerin sheshý úshin QR óńirleri ishinde, sondai-aq Memleket basshysynyń shet eldermen, onyń ishinde Eýraziialyq ekonomikalyq odaq jáne basqa da birlestikter aiasynda ekonomikalyq yntymaqtastyqty damytý jónindegi tapsyrmalaryn oryndaý maqsatynda taiaý jáne alys shetel memleketterine tek qyzmettik maqsattarda oryndalady.
"Kestesiz jolaýshylardy tasymaldaý boiynsha áýe kóligi qyzmetterin (ishki jáne halyqaralyq)" QR PIB "Búrkit" memlekettik áýe kompaniiasy" ShJQ RMK kórsetedi.
Ministrler bastaǵan qazaqstandyq delegatsiialardyń ushý saparlaryn kommertsiialyq áýe kompaniialarynyń reistik jolaýshylar ushaqtary júzege asyrady.
Qazaqstandyq memlekettik BAQ-tyń burynǵy jýrnalisti ushaqta qyzmet kórsetýge qyzyl jáne qara ýyldyryq, araq pen viski, ekzotikalyq jemister kiretinin jazdy, bul da shyndyqqa janaspaidy.
Ushý uzaqtyǵy 1 saǵatqa deiin bolǵan jaǵdaida jolaýshylarǵa alkogolsiz salqyn sýsyndar men snekter, uzaqtyǵy 1-3 saǵat bolǵan kezde ystyq tamaq pen ystyq sýsyndar (shai, kofe) beriledi. Bortta tamaqtandyrý áreket etip turǵan zańnamaǵa – "Qazaqstan Respýblikasynyń áýe keńistigin paidalaný jáne aviatsiia qyzmeti týraly" QR Zańyna, jolaýshylardy, bagajdy jáne júkterdi áýe kóligimen tasymaldaý qaǵidalaryna jáne basqa da normativtik quqyqtyq aktilerge sáikes usynylady.
Osylaisha, qazaqstandyq memlekettik BAQ-tyń burynǵy jýrnalisti taratqan aqparat shyndyqqa janaspaidy. Ókinishke qarai, bul ‒ faktilerdi burmalaýdyń jáne qoǵamdyq rezonans týdyrý úshin jalǵan aqparat taratýdyń taǵy bir jaǵdaiy.
