Mindetti áleýmettik meditsinalyq saqtandyrý júiesinde birinshi jartyjyldyqta meditsinalyq uiymdarǵa tólem jasalǵanǵa deiin 4 mlrd teńgeden astam negizsiz shyǵyn anyqtalǵan, dep habarlaidy dalanews.kz.
Úkimettiń málimetinshe, 2026 jyldyń alǵashqy alty aiynda OSMS júiesindegi antifrod-mehanizmder 4 mlrd teńgeden astam somadaǵy aqaýlardy tólem júrgizilgenge deiin anyqtaǵan.
Buǵan deiin meditsinalyq qyzmetterge qatysty tekserýler qarajat meditsinalyq uiymdarǵa aýdarylǵannan keiin júrgizilse, endi baqylaý tólemge deiin júzege asyrylady. Iaǵni kúmándi nemese negizsiz dep tanylǵan tólemder qarajat aýdarylmai turyp buǵattalady.
OSMS júiesin reformalaý aiasynda meditsinalyq kómekti qarjylandyrýdy baqylaý preventivti formatqa kóshirilip jatyr. 2026 jylǵy qańtardan bastap Áleýmettik meditsinalyq saqtandyrý qory Qarjy ministrliginiń qaraýyna berildi.
Aqpan aiynan bastap júieni basqarý men qarjylandyrýdy tsifrlandyrýǵa baǵyttalǵan reforma júrgizilýde. Meditsinalyq kómekti josparlaý men satyp alýdan bastap ony baqylaý jáne tólem jasaýǵa deiingi búkil qarjylandyrý tsikli Qalqan tsifrlyq platformasyna kóshirilip jatyr.
Qazirgi ýaqytta júie 207 meditsinalyq uiymnyń bazasynda pilottyq rejimde jumys istep tur. Platforma arqyly meditsinalyq kómektiń 92 túriniń 20 baǵyty boiynsha tólem júrgizilýde, al taǵy 60 baǵyt boiynsha testileý júrip jatyr.
Úkimettiń josparyna sáikes, jyl sońyna deiin meditsinalyq kómektiń barlyq málimdelgen túrin platformany ónerkásiptik paidalanýǵa tolyq kóshirý kózdelgen.
Osylaisha, jańa júie meditsinalyq uiymdarǵa qarajat aýdarylǵannan keiin zańsyz nemese negizsiz tólemderdi izdeýden góri, olardyń aldyn ala jolyn kesýge baǵyttalmaq.
