Mindetti áleýmettik meditsinalyq saqtandyrý qorynyń burynǵy basshysy Aidyn Qulseiitov qyzmetinen keter qarsańynda bul jaǵdaidy qor men Densaýlyq saqtaý ministrligi arasyndaǵy tereń korporativtik qaqtyǵystyń saldary dep ataǵan edi. Onyń aitýynsha, másele Úkimet apparaty deńgeiinde qaralyp jatyr jáne janjalǵa qatysy bar tulǵalarǵa tiisti baǵa berilýi tiis, dep habarlaidy Dalanews.kz.
«Jaǵdaidan habary bar adamdar munyń Qor men ministrlik arasyndaǵy tereń korporativtik qaqtyǵystyń saldary ekenin túsinedi. Bul másele qazirdiń ózinde Úkimet apparaty deńgeiinde qaralyp jatyr. Sońynda janjalǵa qatysqandarǵa tiisti baǵa beriledi dep úmittenemin», - degen edi Aidyn Qulseiitov otstavkasynyń aldynda.
Ministrdiń kásibiligine kúmán
Sol kezde bir ústel basynda otyryp aitylǵan Qulseiitovtiń birqatar pikirleri muqiiat taldaǵan jaǵdaida Densaýlyq saqtaý ministri Aqmaral Álnazarovanyń kásibi deńgeiine qatysty suraqtar týyndatatyny baiqalady deidi jýrnalist Botagóz Omarova.
"Qazirgi tańda Densaýlyq saqtaý ministrligi ishki teketires jaǵdaiynda jumys istep jatqandai áser qaldyrady. Aqmaral Álnazarova óz qaramaǵyndaǵy qyzmetkerlerge qatysty shaǵymdardy Premer-ministr Oljas Bektenovke turaqty túrde joldap otyrǵany aitylady. Ministrliktegi negizgi kadrlyq sheshimder premer-ministrmen kelisilip, onyń qol qoiýymen júzege asqan", - deidi jýrnalist.
Qulseiitov máselesi nege kúrdeli boldy
Ministr «qurban» dep tanyǵan birqatar sheneýnikpen másele tez sheshilgen. Alaida Aidyn Qulseiitovke kelgende jaǵdai basqasha órbidi. Álnazarova bir mańyzdy jaitty eskermegeni aitylady: Qulseiitov MÁMS qoryna Prezident ákimshiliginen kelgen, onda segiz jyl qyzmet atqarǵan.
"Onyń kásibi baǵyty - ekonomika, áleýmettik saiasat jáne boljam jasaý. Bul salada jinaqtaǵan tájiribesi ministrde joq ekeni aitylyp júr. Degenmen, Álnazarovanyń Premer-ministrge tikelei qoljetimdiligi bar. Osy jaǵdai bul oqiǵada «kim birinshi shaǵymdandy - sol utty» degen qaǵidanyń iske asýyna sebep bolǵandai", - deidi Omarova.
Alaida bul tek apparattyq teketires kúiinde qalmaǵan. Janjal jariia keńistikke shyqty.
"Aqmaral Álnazarova asyǵys túrde Dinara Sátjanǵa suhbat berdi. 17 jeltoqsanda osy taqyryp aiasynda Ardaq Amangeldiev te pikir bildirip, materialda ol «aýyr salmaqtaǵy tulǵa» retinde ataldy. Buǵan deiin Aidyn Qulseiitovtiń ózi de ashyq málimdeme jasaǵan bolatyn.
Bul jaǵdai sheneýnikterdiń ózara qarym-qatynasty jumys kabinetterinde emes, buqaralyq aqparat quraldary arqyly anyqtaýǵa kóshkenin ańǵartady. Syrt kózge bul otbasylyq janjal kezinde erli-zaiyptylardyń bir-birimen tikelei sóilespei, «Alisa» arqyly tildeskenin eske salady", - deidi jýrnalist.
