Konstitýtsiialyq reforma jónindegi komissiianyń úshinshi otyrysynda Májilis depýtaty Maksim Rojin Ata Zańǵa engiziletin birqatar ózgeristi qoldaitynyn bildirdi. Ol Halyq keńesin qurý men Vitse-prezident institýtyn engizý qoǵamdyq dialogti kúsheitip, eldegi basqarý sapasyn arttyrýǵa baǵyttalǵanyn atap ótti.
Maksim Rojinniń aitýynsha qoldanystaǵy qoǵamdyq dialog alańdary kei jaǵdaida tutas jalpyulttyq múddeni qamtamasyz ete almai otyr. Osyǵan bailanysty Konstitýtsiiada Halyq keńesin bekitý - obektivti qajettilik dep esepteidi. Onyń pikirinshe, bul qurylym azamattardyń zań shyǵarý úderisine júieli ári tikelei qatysýyna múmkindik beredi.
Osy turǵyda Maksim Rojin Halyq keńesine zań jobalary, ishki saiasat jáne referendým ótkizý máseleleri boiynsha usynys jasaý quqyǵyn berý ulttyq jáne álemdik tájiribede tiimdiligin dáleldegen ozyq model ekenin atap ótti. Onyń aitýynsha, mundai tetik qoǵamnyń belsendi azamattaryna zań shyǵarý protsesine naqty qatysýǵa múmkindik beretinin aitty.
«Búgingi qoǵam - belsendi jáne talapshyl. Endi shashyrandy dialog alańdary, túrli qoǵamdyq platformalar kei jaǵdaida tutas jalpyulttyq múdde men talqylaýdy qamtamasyz ete almaidy. Sondyqtan usynylǵan Halyq keńesi - formaldi jańalyq emes, obektivti qajettilik», - dedi Maksim Rojin.
Sonymen qatar ol Halyq keńesiniń quramyna etnostardyń, óńirlerdiń jáne qoǵamdyq uiymdardyń ókilderi enetinin atap ótti. Bul keńesti memleket pen qoǵam arasyndaǵy altyn kópirge ainaldyryp, ulttyq birlikti naqty ispen qamtamasyz etýge jol ashady.
Baiandamasynda Maksim Rojin bilik tarmaqtarynyń jaýapkershiligin kúsheitýge baǵyttalǵan túzetýlerge de toqtaldy. Usynylǵan ózgerister «Kúshti Prezident - Yqpaldy Parlament - Esep beretin Úkimet» qaǵidatyn naqty mazmunmen tolyqtyrady.
Qorytyndylai kele, depýtat usynylyp otyrǵan konstitýtsiialyq túzetýler memlekettilikti evoliýtsiialyq jolmen kúsheitetinin aitty jáne komissiia múshelerin bul bastamalardy qoldaýǵa shaqyrdy.
