Atyraýda "Jer máselesine" qatysty miting ótkizgeni úshin sottalǵan belsendiler Maks Boqaev pen Talǵat Aian terrorizm men ekstremizmdi qarjylandyratyn tizimge engizilgen. Al qazir olardyń qai túrmede otyrǵany belgisiz.
Terrorizm men ekstremizmdi qarjylandyratyn uiymdar men adamdardyń tizimi Qazaqstannyń qarjy ministrliginiń qarjylyq baqylaý saitynda jariialanǵan. Ol tizimge elde ekstremizm men terrorizm boiynsha sottalǵan adamdar engen.
Azamattyq belsendiler Maks Boqaev pen Talǵat Aian 2016 jyldyń 24 sáýirinde Atyraýda biliktiń jer reformasyna qatysty zańyna qarsy shyǵyp, jappai ótken mitingke qatysqan. Olar sol úshin "arazdyq týǵyzdy", "jalǵan aqparat taratty" jáne "miting ótkizý tártibin buzdy" degen aiyptarmen bes jylǵa bas bostandyqtarynan aiyrylǵan. Ótken aida Atyraýdyń apelliatsiialyq soty olarǵa qatysty sot sheshimin kúshinde qaldyrdy.
Maks Boqaev pen Talǵat Aiannyń qai túrmede otyrǵany belgisiz. Maks Boqaevtyń týystarynyń aitýynsha, ony batystan ońtústik arqyly Petropavlovskidegi ES-164/3 abaqtysyna jibermek.
Halyqaralyq adam quqyqtaryn qorǵaityn Human Rights Watch uiymy Maks Boqaev pen Talǵat Aianǵa qatysty shyqqan sot sheshimin aiyptady. Eýropalyq odaq olardy bosatýdy talap etti. BUU sarapshylary Boqaev pen Aiandy sottaýynda saiasi astar bar dedi.
