اتىراۋدا "جەر ماسەلەسىنە" قاتىستى ميتينگ وتكىزگەنى ءۇشىن سوتتالعان بەلسەندىلەر ماكس بوقايەۆ پەن تالعات ايان تەرروريزم مەن ەكسترەميزمدى قارجىلاندىراتىن تىزىمگە ەنگىزىلگەن. ال ءقازىر ولاردىڭ قاي تۇرمەدە وتىرعانى بەلگىسىز.
تەرروريزم مەن ەكسترەميزمدى قارجىلاندىراتىن ۇيىمدار مەن ادامداردىڭ ءتىزىمى قازاقستاننىڭ قارجى مينيسترلىگىنىڭ قارجىلىق باقىلاۋ سايتىندا جاريالانعان. ول تىزىمگە ەلدە ەكسترەميزم مەن تەرروريزم بويىنشا سوتتالعان ادامدار ەنگەن.
ازاماتتىق بەلسەندىلەر ماكس بوقايەۆ پەن تالعات ايان 2016 جىلدىڭ 24 ساۋىرىندە اتىراۋدا بيلىكتىڭ جەر رەفورماسىنا قاتىستى زاڭىنا قارسى شىعىپ، جاپپاي وتكەن ميتينگكە قاتىسقان. ولار سول ءۇشىن "ارازدىق تۋعىزدى"، "جالعان اقپارات تاراتتى" جانە "ميتينگ وتكىزۋ ءتارتىبىن بۇزدى" دەگەن ايىپتارمەن بەس جىلعا باس بوستاندىقتارىنان ايىرىلعان. وتكەن ايدا اتىراۋدىڭ اپەللياسيالىق سوتى ولارعا قاتىستى سوت شەشىمىن كۇشىندە قالدىردى.
ماكس بوقايەۆ پەن تالعات اياننىڭ قاي تۇرمەدە وتىرعانى بەلگىسىز. ماكس بوقايەۆتىڭ تۋىستارىنىڭ ايتۋىنشا، ونى باتىستان وڭتۇستىك ارقىلى پەتروپاۆلوۆسكىدەگى ەس-164/3 اباقتىسىنا جىبەرمەك.
حالىقارالىق ادام قۇقىقتارىن قورعايتىن Human Rights Watch ۇيىمى ماكس بوقايەۆ پەن تالعات ايانعا قاتىستى شىققان سوت شەشىمىن ايىپتادى. ەۋروپالىق وداق ولاردى بوساتۋدى تالاپ ەتتى. بۇۇ ساراپشىلارى بوقايەۆ پەن اياندى سوتتاۋىندا ساياسي استار بار دەدى.
