Májilis "Aýyl sharýashylyǵyn sýbsidiialaýǵa bólingen memlekettik qarajatty paidalaný tiimdiligi týraly" Joǵary aýditorlyq palata esebin nazarǵa ala otyryp, qaýly shyǵardy. Onda Úkimetke aýyl sharýashylyǵyn memlekettik qoldaý deńgeiin 8,5%-ǵa deiin kóterý usynylady, dep jazady Dalanews.kz.
Depýtattar Úkimetke mynalardy usynady:
- EAEO elderiniń kelisilgen agroónerkásiptik saiasat sharalaryn iske asyrý jónindegi mindettemelerin saqtaý boiynsha dáiekti jumys júrgizýdi,
- Qazaqstandaǵy aýyl sharýashylyǵyn memlekettik qoldaý deńgeiin Eýraziialyq ekonomikalyq komissiia Keńesiniń sheshimimen bekitilgen ádisnamaǵa sáikes 8,5% kólemine deiin jetkizýdi,
- aýyl sharýashylyǵy tehnikasyn jańartý kórsetkishin jylyna 8-10%-ǵa jetkizý maqsatymen jeńildetilgen nesielendirý men lizingke qarjylandyrý kólemin ulǵaitýdy,
- aýyl sharýashylyǵy mashinasyn jasaý salasynda óndirister ashý jáne olardyń jergilikti deńgeide iske asyrylýyn arttyrý máselelerin qarastyrýdy.
Sondai-aq qujatta Aýylsharýashylyǵy ministrligine bólinetin sýbsidiialardy nysanaly indikatorlarǵa qol jetkizýge baǵyttai otyryp, agroónerkásiptik keshendi damytýdy strategiialyq josparlaýdy jetildirý jónindegi sharalar qabyldaý usynylady.
Al jergilikti atqarýshy organdardyń salany sýbsidiialaý, sýbsidiialar boiynsha tólemderdi kidirtýge jol bermei, biýdjet qarajatynyń paidalanylýyn monitoringileý jáne baqylaý jónindegi qyzmetin úilestirýdi kúsheitý qajet.
Sýbsidiia alýshylar qarsy mindettemeleri retinde aýyl sharýashylyǵy taýaryn óndirýshilerdiń ozyq, ekologiia turǵysynan qaýipsiz jáne innovatsiialyq agrotehnologiialardy qoldaný arqyly qamtamasyz etiletin naqty kórsetkishterge qol jetkizýge tiis.
Oblystyq ákimdikterge ártúrli sýbsidiialar boiynsha tólem merzimderiniń buzylýyna jol bermei, agroónerkásiptik keshen salasyndaǵy is-sharalardy qarjylandyrýdy biýdjettik josparlaý sapasyn arttyrý, sýbsidiialaý baǵdarlamalaryna barlyq qatysýshy úshin aqparatqa jáne konsýltatsiialarǵa qoljetimdilikti arttyrý jónindegi sharalardy qabyldaý usynyldy.
Qazaqstan Respýblikasynyń Joǵary aýditorlyq palatasy anyqtalǵan buzýshylyqtardy joiý jáne olarǵa jol bergen adamdardyń jaýapkershiligin qaraý týraly aýditorlyq is-shara nusqamalarynyń oryndalýyna baqylaýdy júzege asyrsyn jáne 2025 jylǵy 1 shildege deiingi merzimde olardyń oryndalýy týraly aqparatty Qazaqstan Respýblikasy Parlamentiniń Májilisine usynsyn.
Atalǵan qaýlynyń oryndalýyn baqylaý QR Parlamenti Májilisi tóraǵasynyń orynbasary Albert Raýǵa júktelgeni de naqtylanady.
Buǵan deiin búgin Májiliste depýtattar aldynda Joǵary aýditorlyq palatanyń tóraǵasy Álihan Smaiylov aýylsharýashylyǵyndaǵy túiitkildi máseleler, onyń ishinde sýbsidiia boiynsha esep bergenin jazǵanbyz. Onyń aitýynsha, 5,4 mlrd teńgege sýbsidiia alǵandardyń 3 myńǵa jýyǵy tipti agroónerkásip kesheniniń sýbektileri emes.
