Keshe Májilis otyrysynda anasyn quttyqtaǵan depýtat Ardaq Nazarov jurttyń synyna qaldy. Búgin Senat dálizinde bul jaıtqa Senat spıkeri Máýlen Áshimbaev pikir bildirdi, - dep habarlaıdy Dalanews.kz.

Ol kórshi palatadaǵy depýtattardyń áreketine pikir bildirý "durys emes" ekenin jetkizdi. Dese de jýrnalıs "Senatta mundaı jaǵdaıy bolýy múmkin be?" dep surady.

"Senatorlardyń biri anasyn qatty jaqsy kóretin bolsa, múmkin. Biraq ázirge mundaı jaǵdaı bolǵan joq", - dep jaýap berdi Áshimbaev.

Eske salaıyq, keshe Ardaq Nazarov anasynyń 70 jyldyq mereıtoıy ekenin aıtyp,sózin tilekten bastady.

"Qadirli anashym, sizdi týǵan kúnińizben shyn júrekten quttyqtaımyn. Sizdiń meıirimge toly júregińizge, júzińizden tógilgen nurǵa shomylyp óstim. Anashym, áketaıym ekeýińiz máńgi birge bolyp, nemerelerińizdiń qyzyǵyn kórińizder. Sizdi qatty jaqsy kóremin, sizdiń aldyńyzda basymdy ıemin", - dedi ol.

Jeli qoldanýshylary depýtattyń bul áreketine narazylyq tanytyp, "Májilisti oıynshyqqa aınaldyrdyńdar" dep te synady.

"Anasyn úıde quttyqttamaı ma? Oıynshyq qyldy Májilisti", "Zań shyǵaratyn oryn emes pe? Tilek aıtatyn jer emes", - dedi olar.