Májilis depýtaty Dinara Naýmova erekshe qajettilikteri bar azamattardy qoldaý baǵytyndaǵy jumystar týraly aitty. Onyń sózinshe, bul baǵyttaǵy bastamalar júieli túrde júzege asyrylyp keledi, alaida máseleniń aýqymy uzaq merzimdi ári keshendi tásildi talap etedi, dep habarlaidy Dalanews.kz.
Depýtattyń aitýynsha, onyń jumysyndaǵy basym baǵyttardyń biri – múgedektigi bar adamdar men erekshe balalardy tárbielep otyrǵan otbasylardy qoldaý.
«Zańnamalyq bastamalar men praktikalyq sharalar aiasynda qoljetimdi ortany qalyptastyrý, reabilitatsiialyq ortalyqtardy damytý, múgedektikti aiqyndaý júiesin jetildirý, áleýmettik portal arqyly kórsetiletin qyzmetter men taýarlar sapasyn arttyrý baǵytynda jumystar júrgizilýde.
Sonymen qatar, qoljetimdi turǵyn úimen qamtamasyz etý, jumysqa ornalastyrý, zeinetaqy jáne áleýmettik tólemder júiesin jetildirý, invataksi qyzmetin damytý, inkliýzivti bilim berýdi keńeitý máseleleri de turaqty nazarda", - deidi Dinara Naýmova.
Dinara Naýmova jumys júieli túrde júrgizilip jatqanyn, alaida bul uzaq merzimdi ári kúrdeli protsess ekenin eske saldy.
"Qazirgi tańda erekshe balalardy keshendi qoldaý týraly zań jobasy qaralýda. Bul bastama bilim berý, densaýlyq saqtaý jáne áleýmettik qorǵaý salalaryn biriktire otyryp, otbasylarǵa júieli ári úzdiksiz qoldaý kórsetýge baǵyttalǵan.
Aǵymdaǵy jyly qańtarda jańa Qurylys kodeksi qabyldandy. Ony ázirleý barysynda men qoljetimdi ortany kúsheitýge erekshe nazar aýdardym. Jańa normalar áleýmettik infraqurylym nysandarynyń, joldardyń, trotýarlar men ótkelderdiń qoljetimdiligin qamtamasyz etýdi mindetteidi. Burynǵy standarttar formaldy oryndalsa, kodekste normalardyń resmi bekitilýi baqylaýdy kúsheitip, olardyń naqty iske asýyna negiz qalaidy", – dedi depýtat.
Osylaisha, depýtattyń pikirinshe, inkliýzivti qoǵam qalyptastyrý tek zańnamalyq ózgeristermen shektelmeidi. Bul baǵytta infraqurylymdy beiimdeý, áleýmettik qoldaýdy kúsheitý jáne qoǵam kózqarasyn ózgertý qatar júrýi tiis.
