ءماجىلىس دەپۋتاتى دينارا ناۋموۆا ەرەكشە قاجەتتىلىكتەرى بار ازاماتتاردى قولداۋ باعىتىنداعى جۇمىستار تۋرالى ايتتى. ونىڭ سوزىنشە، بۇل باعىتتاعى باستامالار جۇيەلى تۇردە جۇزەگە اسىرىلىپ كەلەدى، الايدا ماسەلەنىڭ اۋقىمى ۇزاق مەرزىمدى ءارى كەشەندى ءتاسىلدى تالاپ ەتەدى، دەپ حابارلايدى Dalanews.kz.
دەپۋتاتتىڭ ايتۋىنشا، ونىڭ جۇمىسىنداعى باسىم باعىتتاردىڭ ءبىرى – مۇگەدەكتىگى بار ادامدار مەن ەرەكشە بالالاردى تاربيەلەپ وتىرعان وتباسىلاردى قولداۋ.
«زاڭنامالىق باستامالار مەن پراكتيكالىق شارالار اياسىندا قولجەتىمدى ورتانى قالىپتاستىرۋ، رەابيليتاسيالىق ورتالىقتاردى دامىتۋ، مۇگەدەكتىكتى ايقىنداۋ جۇيەسىن جەتىلدىرۋ، الەۋمەتتىك پورتال ارقىلى كورسەتىلەتىن قىزمەتتەر مەن تاۋارلار ساپاسىن ارتتىرۋ باعىتىندا جۇمىستار جۇرگىزىلۋدە.
سونىمەن قاتار، قولجەتىمدى تۇرعىن ۇيمەن قامتاماسىز ەتۋ، جۇمىسقا ورنالاستىرۋ، زەينەتاقى جانە الەۋمەتتىك تولەمدەر جۇيەسىن جەتىلدىرۋ، ينۆاتاكسي قىزمەتىن دامىتۋ، ينكليۋزيۆتى ءبىلىم بەرۋدى كەڭەيتۋ ماسەلەلەرى دە تۇراقتى نازاردا"، - دەيدى دينارا ناۋموۆا.
دينارا ناۋموۆا جۇمىس جۇيەلى تۇردە جۇرگىزىلىپ جاتقانىن، الايدا بۇل ۇزاق مەرزىمدى ءارى كۇردەلى پروسەسس ەكەنىن ەسكە سالدى.
"قازىرگى تاڭدا ەرەكشە بالالاردى كەشەندى قولداۋ تۋرالى زاڭ جوباسى قارالۋدا. بۇل باستاما ءبىلىم بەرۋ، دەنساۋلىق ساقتاۋ جانە الەۋمەتتىك قورعاۋ سالالارىن بىرىكتىرە وتىرىپ، وتباسىلارعا جۇيەلى ءارى ۇزدىكسىز قولداۋ كورسەتۋگە باعىتتالعان.
اعىمداعى جىلى قاڭتاردا جاڭا قۇرىلىس كودەكسى قابىلداندى. ونى ازىرلەۋ بارىسىندا مەن قولجەتىمدى ورتانى كۇشەيتۋگە ەرەكشە نازار اۋداردىم. جاڭا نورمالار الەۋمەتتىك ينفراقۇرىلىم نىساندارىنىڭ، جولداردىڭ، تروتۋارلار مەن وتكەلدەردىڭ قولجەتىمدىلىگىن قامتاماسىز ەتۋدى مىندەتتەيدى. بۇرىنعى ستاندارتتار فورمالدى ورىندالسا، كودەكستە نورمالاردىڭ رەسمي بەكىتىلۋى باقىلاۋدى كۇشەيتىپ، ولاردىڭ ناقتى ىسكە اسۋىنا نەگىز قالايدى"، – دەدى دەپۋتات.
وسىلايشا، دەپۋتاتتىڭ پىكىرىنشە، ينكليۋزيۆتى قوعام قالىپتاستىرۋ تەك زاڭنامالىق وزگەرىستەرمەن شەكتەلمەيدى. بۇل باعىتتا ينفراقۇرىلىمدى بەيىمدەۋ، الەۋمەتتىك قولداۋدى كۇشەيتۋ جانە قوعام كوزقاراسىن وزگەرتۋ قاتار ءجۇرۋى ءتيىس.
