Mańǵystaý atom energetikalyq kombinaty úsh jylǵa salyqtan bosatylýy yqtimal. Búgin Májilis depýtattary osyǵan qatysty zań jobasyn maquldap, Senattyń qaraýyna joldady. Eger joǵarǵy palata qoldasa, kásiporynǵa memleket bólgen sýbsidiiaǵa qatysty salyq júktemesi alynyp tastalady, dep habarlaidy Dalanews.kz.
Májilis depýtaty Edil Jańbyrshinniń aitýynsha, qazirgi zańnama boiynsha kommýnaldyq kásiporyn alǵan sýbsidiianyń 20 paiyzy tabys salyǵy retinde qaitadan memleketke qaitarylýy tiis. Ótken jyly MAEK respýblikalyq biýdjetten 5 mlrd teńge alǵan, sonyń 1 mlrd teńgesin salyq retinde óteýi qajet bolǵan.
«Memleket óz kásipornyna qarjylai qoldaý kórsetedi, biraq onyń 20 paiyzyn salyq arqyly qaita alady. Sondyqtan bólingen qarajat tolyq kólemde qaryzdardy óteýge nemese óndiristik keshenderdi jańartýǵa jumsalýy úshin bul salyq túrin alyp tastaý usynylyp otyr. Sebebi bul – memlekettik mekeme, memlekettik aqsha. Qarajat tiimdi paidalanylýy tiis», – dedi Májilis depýtaty Edil Jańbyrshin.
MAEK-tegi infraqurylym máselesi búgingi tańda óte kúrdeli. Kei jabdyqtardyń ábden eskirgeni aitylyp keledi. Depýtat keltirgen derekke sáikes, týrbinalardyń 95 paiyzynyń, al qazandyqtardyń 85 paiyzynyń qyzmet merzimi ótken. Sol sebepti kásiporyn tolyq qýatta jumys istei almai otyr. Buǵan qosa, mekemeniń tek «QazTransGazAimaq» aldyndaǵy bereshegi 20 mlrd teńgege jetken.
Aita keterligi, zań jobasynda qarastyrylǵan jeńildikter tek MAEK-ke ǵana qatysty, ózge kásiporyndarǵa mundai múmkindik berilmeidi.
«Bul jerde másele tarifke bailanysty emes. Basty maqsat — MAEK-tiń qordalanǵan qaryzdaryn jabý. Tarif máselesin Energetika ministrligi óz tártibine sai esepteidi. Biraq qazirgi tariften kásiporyn paida kórip otyrǵan joq», – dedi Edil Jańbyrshin.
