Otyz jylǵa jýyqtaǵan táýelsizdik jyldarynda osylaısha, eki túrli álemniń paıda bolýy olardyń ózara til tabysýlaryna qıyndyq týdyra bastady. Árıne, munyń sońy jaqsylyqqa aparmasy basy ashyq áńgime.
Bıliktiń halyqqa jaqyndaýy, birge tynystaýy qoǵamdaǵy turaqtylyqty qamtasyz etetin basty faktor.
Osyny eskerse kerek, QR Prezıdenti Q.Toqaev alǵashqy Joldaýynda bıliktegi laýazym ıeleriniń halyqqa etene jaqyndaýyn, el-jurtpen arada salmaqty dıalogtyń ornaýyn talap etti.
Osyndaı izgi nıetpen Qoǵamdyq senim keńesin qurǵanymen, onyń ázirshe nátıjesi kómeskileý bolyp tur. Atalmysh keńes alǵashqy jıyndarynan-aq ózderin «Nur Otan» partıasynyń fılıaly sekildi kórsetip aldy. Olarǵa qazir bıliktiń senimi qanshalyqty ekenin bilmeımiz. Halyqtyń senimi sonshalyqty keremet deýge kelmeıdi.
Jalpy, joǵary laýazym ıeleri óz qyzmetimen qatar kúndelikti is-áreketin, oı-pikirin halyqqa jarıa túrde kórsete alǵanda ǵana oǵan degen senim artady.
Esh rıasyz ashylyp sóılep, syryn aıtqannyń ózinde jurt ony ózine jaqyn tartyp, razy-hosh bolyp jatady.
Al meılinshe, tuıyqtalyp, syr bildirmeı sazaryp júrgen saıasatkerge de, memlekettik joǵary laýazym ıesine de senimsizdik pen kúdik ulǵaıa túspese, senim az bolady.
Olaı bolsa, laýazym ıeleriniń halyqqa jaqyndaýynyń, olarmen emen-jarqyn dıalog qurýdyń mańyzdy tetigi – aqparat quraldarynyń ashyq minberlerine jıi shyǵýy, jarıaly túrde tildesýi bolsa kerek. Ókinishke qaraı, bizdiń ákim-qaralar, laýazymy iri tulǵalar jýrnalıserden at-tondaryn ala qashady.
Tikeleı efır dese tipti, jolamaıdy. Jaı suhbattyń ózine orynbasaryn jiberedi. Keıbiri tipti baspasóz qyzmetin alǵa tartyp, ózderi izim-ǵaıym qashyp joǵalady.
Bizdegi aqparat quraldarynyń kóbi Úkimetke baǵynyshty, tikeleı solardyń yǵymen júretinderiniń kóptigine qaramastan, bulaı úrkýdiń syry halyq aldyna shyǵýdan qaımyǵatyn álde bir syrlary bar ma degendeı kúdik týdyratynyn nesine jasyraıyq.
Degenmen mınıstrlerimizdiń arasynda da ara-tura aqparat ókilderimen ashyq áńgimege baratyndary kezdesedi eken. Bul turǵydan kelgende, óz basym QR Mádenıet jáne sport mınıstri Aqtoty Raıymqulova jańasha kózqarasy basym, halyqpen til tabysa alatyn demokratıalyq qoǵamǵa beıim tulǵa retinde kórip otyrmyn.
Negizi, betpe-bet áńgimege daıyn bola alýdyń astarynda belgili bir tulǵanyń myqtylyǵy desek te bolady. Ózin bar bolmysymen shynaıy kórsete alýynyń ózi mınıstr laýazymdy tulǵa úshin halyqqa jaqyndyǵyn kórsetetin taǵy bir qyry deýge bolady.
Aqtoty Raıymqulova hanymnyń ashyq suhbatqa batyl shyǵyp, shynaıy jaýap bergenin Iýtýb arnasynan kórip qaldym.
Shyndyǵyn aıtqanda, kóptegen birinshi basshylardyń mundaıǵa júregi daýalamaıdy ǵoı, negizi. Onyń ózinde bıliktiń yǵyna jyǵylyp, sózin sóılep júrgen resmı BAQ emes, Aman Tasyǵan sekildi tym erkin ári senzýrasyz sóıleıtin blogerdiń usynysyn qabyldap tikeleı efırge shyǵýy mınıstr qaryndastyń ózine degen senimdiligin jáne qoǵam aldyndaǵy zor jaýapkershilikti tereń sezine bilgendigi bolsa kerek.
Aqtoty hanym blogerdiń barlyq suraǵyna esh tosylmastan, salmaqty jaýap bere alýy jas mınıstrdiń álden ysyla bastaǵan batyl saıasatker ekendigin ańǵartqandaı boldy.
Men onyń osy qadamyna razy boldym. Demokratıalyq ashyq qoǵam qurý úshin mınıstrler halyqpen osylaısha dıalogqa shyǵa alatyn bolǵany abzal. Ózgeler úlgi alsa, qanekı.
Qýandyq SHAMAHAIULY, jýrnalıs
Arnaıy «Qala men Dala» gazeti úshin
