AQSh pen Ulybritaniia sanktsiiasyna ushyraǵan reseilik «Lýkoil» munai kompaniiasy sheteldegi birqatar aktivin Carlyle investitsiialyq kompaniiasyna satty,dep habarlaidy Dalanews.kz.
Kompaniianyń habarlaýynsha, mámile aiasynda Qazaqstan Respýblikasyndaǵy aktivter «Lýkoil» tobynyń menshiginde qalady jáne tiisti litsenziialar aiasynda jumysyn jalǵastyra beredi.
Satylatyn aktivterdiń jalpy quny 22 mlrd dollar dep baǵalanǵan. Olardyń qatarynda Qazaqstan, Ázerbaijan jáne Iraktaǵy munai ken oryndary, sondai-aq Eýropa men AQSh-taǵy óńdeý zaýyttary men janarmai beketteri bar. Degenmen Qazaqstandaǵy úlester bul tizimge engizilmegen.
Kompaniia mámileni retteýshi organdarmen áli kelisý qajet ekenin de atap ótti. Sonymen birge Carlyle AQSh-tyń shetel aktivterin baqylaý basqarmasynan ruqsat alýy tiis. «Lýkoil» basqa da yqtimal satyp alýshylarmen kelissóz júrgizip jatqanyn málimdedi. Sheteldegi aktivterdi satý sheshimi «jekelegen memleketter engizgen shekteýlermen» bailanysty ekeni aityldy.
Eske salaiyq, 2025 jylǵy 15 qazanda Ulybritaniia, al 23 qazanda AQSh «Lýkoil» jáne «Rosneft» kompaniialaryna sanktsiia salǵan bolatyn. Osydan keiin «Lýkoil» sheteldegi munai aktivterin satatynyn jariialady.
«Lýkoil» Qazaqstandaǵy birqatar iri jobalarǵa qatysady. Olardyń qatarynda Qarashyǵanaq pen Teńiz ken oryndary bar. Budan bólek, kompaniia qazaq munaiynyń basym bóligi tasymaldanatyn Kaspii qubyr jelisi konsortsiýmynda 12,5% úleske ie. Qarashyǵanaq jobasyna 1997 jyly, sol jyly Teńiz jobasyna da qosylǵan.
28 qańtarda energetika ministri Erlan Aqkenjenov Qazaqstan AQSh-qa resmi hat joldaǵanyn málimdegen. Úkimet «Lýkoildyń» birlesken jobalardaǵy úlesin satyp alý múmkindigin qarastyryp otyrǵanyn aitqan edi.
