10 jylǵa sottalǵan jolaýshylar kóligi jáne avtomobil joldary basqarmasynyń burynǵy basshysy Rashid Amanjolovtyń advokaty Sáýle Aqatovanyń aitýynsha, istiń mán-jaiyn anyqtaý maqsatynda appeliatsiialyq sotqa prezident kómekshisi, qaýipsizdik keńesiniń hatshysy Áset Isekeshev, Almaty ákimi Baqytjan Saǵyntaev, ulttyq bank tóraǵasy Erbolat Dosaev pen Qazaqstannyń Reseidegi burynǵy elshisi Imanǵali Tasmaǵambetovty shaqyrý qajet.
Olar san alýan qarama-qaishylyqtardy joiýǵa jáne shyndyqty bilýge kómektese alady. Óitkeni barlyǵy LRT qurylysy kezinde jaýapty qyzmette bolǵan.
"Biz sotqa burynǵy premer-ministr Serik Ahmetovty, premer-ministrdiń birinshi orynbasary (qazir Almaty ákimi) Baqytjan Saǵyntaevty, indýstriia jáne jańa tehnologiialar ministri (qazir prezident kómekshisi) Áset Isekeshevti shaqyryp, onlain rejimde jaýap alýdy suraimyz. Olarǵa ózderi qol qoiǵan qujattardy da kórsetý kerek. Sosyn ol qujattardyń mańyzdylyǵyn, tómen turǵan memlekettik qurylymdar men laýazymdy tulaǵalardyń atqarǵan mindetteri jaiynda suraý qajet", – dedi Aqatova.
Onyń aitýynsha, LRT qurylysy boiynsha sheshim qabyldaǵan adamdar osy jobanyń memleket úshin nesimen tiimdi bolǵanyn túsindirip berýge tiis.
"Nege tiimsiz bolǵanyna qaramastan úkimet qurylysty tolyǵymen toqtatqan joq? Nege jobanyń qunyn arttyra otyryp, biýdjet qarjysyn salýdy jalǵastyra bergen?", – deidi advokat.
Sondai-aq Aqatova sotqa Qazaqstannyń Niderland Koroldigindegi qazirgi elshisi Asqar Jumaǵalievty, áleýmettik meditsinalyq saqtandyrý qory direktorlar keńesiniń tóraǵasy Bolat Jámishevti jáne Tuńǵysh prezident ákimshiliginiń eks-basshysy Ádilbek Jaqsybekovty shaqyrý qajet dep sanaidy.
"Osy tulǵalardan Amanjolovqa taǵylǵan aiyptar aiasynda ózderi qabyldaǵan sheshimder boiynsha jaýap alynýǵa tiis. Áitpese Amanjolovtyń qandai áreketi zańǵa qaishy bolǵanyn qosymsha bilýge esh múmkindik bolmai tur", – deidi Aqatova.
Budan bólek, advokat LRT jobasyna qatysqan sheteldik seriktesterden jaýap alýdy surady. Al shetelge qashyp ketken elorda ákiminiń burynǵy orynbasary Qanat Sultanbekov pen "Astana LRT" basqarmasynyń tóraǵasy Talǵat Ardan sotta jaýap bermese, istiń anyq-qanyǵyn anyqtaý qiyn.
Advokattardyń oiynsha, quqyq qorǵaý organdary halyqaralyq izdeýde júrgenderdi izdep jatqan joq. Sáýle Aqatovanyń ótinishin basqa advokattar da qoldady. Al prokýror Arsen Begalin joǵary laýazymdy sheneýnikterdi sotqa shaqyrýǵa qarsy boldy.
"Ondai ótinish sottyń birinshi satysynda jariialanǵan. Ol adamdardan jaýap alýdyń qajeti joq dep sanaimyn. Sebebi is boiynsha barlyq dálel qarastyryldy", – dedi prokýror Begalin.
Aita ketelik LRT qurylysyna bólingen qarjyny jymqyrý isi boiynsha alǵashqy sot otyrysy 2020 jyly 29 qazanda ótti. Jeti adam 5,8 milliard teńgeni jymqyrǵany úshin aiyptaldy.
Al elorda ákiminiń burynǵy orynbasary Qanat Sultanbekov pen "Astana LRT" JShS burynǵy basshysy Talǵat Ardan halyqaralyq izdeýde júr.
2013 jyly eks-prezident Nursultan Nazarbaev LRT qurylysy tym qymbatqa túsetinin málimdedi. Birneshe jyldan keiin qytailyq investorlar keldi. Al 2019 jyly shilde aiynda Qasym-Jomart Toqaev jeńil relsti kólik qurylysyn synǵa alyp, osy jobanyń tiimdiligine senbeitinin aitty.
Biylǵy jyldyń maýsym aiynda elorda ákimi Altai Kólginov LRT qurylysynyń qaita jandanǵanyn málimdedi. LRT-ny tolyǵymen aiaqtaý úshin qosymsha 1 milliard dollar qajet.
Osy sátte:
https://dalanews.kz/news/67610-taldykol-kolding-batpaqty-emes-taza-zhe
