10 جىلعا سوتتالعان جولاۋشىلار كولىگى جانە اۆتوموبيل جولدارى باسقارماسىنىڭ بۇرىنعى باسشىسى راشيد امانجولوۆتىڭ ادۆوكاتى ساۋلە اقاتوۆانىڭ ايتۋىنشا، ءىستىڭ ءمان-جايىن انىقتاۋ ماقساتىندا اپپەلياسيالىق سوتقا پرەزيدەنت كومەكشىسى، قاۋىپسىزدىك كەڭەسىنىڭ حاتشىسى اسەت يسەكەشيەۆ، الماتى اكىمى باقىتجان ساعىنتايەۆ، ۇلتتىق بانك ءتوراعاسى ەربولات دوسايەۆ پەن قازاقستاننىڭ رەسەيدەگى بۇرىنعى ەلشىسى يمانعالي تاسماعامبەتوۆتى شاقىرۋ قاجەت.
ولار سان الۋان قاراما-قايشىلىقتاردى جويۋعا جانە شىندىقتى بىلۋگە كومەكتەسە الادى. ويتكەنى بارلىعى LRT قۇرىلىسى كەزىندە جاۋاپتى قىزمەتتە بولعان.
"ءبىز سوتقا بۇرىنعى پرەمەر-مينيستر سەرىك احمەتوۆتى، پرەمەر-مينيستردىڭ ءبىرىنشى ورىنباسارى (ءقازىر الماتى اكىمى) باقىتجان ساعىنتايەۆتى، يندۋستريا جانە جاڭا تەحنولوگيالار ءمينيسترى (ءقازىر پرەزيدەنت كومەكشىسى) اسەت يسەكەشيەۆتى شاقىرىپ، ونلاين رەجيمدە جاۋاپ الۋدى سۇرايمىز. ولارعا وزدەرى قول قويعان قۇجاتتاردى دا كورسەتۋ كەرەك. سوسىن ول قۇجاتتاردىڭ ماڭىزدىلىعىن، تومەن تۇرعان مەملەكەتتىك قۇرىلىمدار مەن لاۋازىمدى تۇلاعالاردىڭ اتقارعان مىندەتتەرى جايىندا سۇراۋ قاجەت"، – دەدى اقاتوۆا.
ونىڭ ايتۋىنشا، LRT قۇرىلىسى بويىنشا شەشىم قابىلداعان ادامدار وسى جوبانىڭ مەملەكەت ءۇشىن نەسىمەن ءتيىمدى بولعانىن ءتۇسىندىرىپ بەرۋگە ءتيىس.
"نەگە ءتيىمسىز بولعانىنا قاراماستان ۇكىمەت قۇرىلىستى تولىعىمەن توقتاتقان جوق؟ نەگە جوبانىڭ قۇنىن ارتتىرا وتىرىپ، بيۋدجەت قارجىسىن سالۋدى جالعاستىرا بەرگەن؟"، – دەيدى ادۆوكات.
سونداي-اق اقاتوۆا سوتقا قازاقستاننىڭ نيدەرلاند كورولدىگىندەگى قازىرگى ەلشىسى اسقار جۇماعالييەۆتى، الەۋمەتتىك مەديسينالىق ساقتاندىرۋ قورى ديرەكتورلار كەڭەسىنىڭ ءتوراعاسى بولات جامىشيەۆتى جانە تۇڭعىش پرەزيدەنت اكىمشىلىگىنىڭ ەكس-باسشىسى ادىلبەك جاقسىبەكوۆتى شاقىرۋ قاجەت دەپ سانايدى.
"وسى تۇلعالاردان امانجولوۆقا تاعىلعان ايىپتار اياسىندا وزدەرى قابىلداعان شەشىمدەر بويىنشا جاۋاپ الىنۋعا ءتيىس. ايتپەسە امانجولوۆتىڭ قانداي ارەكەتى زاڭعا قايشى بولعانىن قوسىمشا بىلۋگە ەش مۇمكىندىك بولماي تۇر"، – دەيدى اقاتوۆا.
بۇدان بولەك، ادۆوكات LRT جوباسىنا قاتىسقان شەتەلدىك سەرىكتەستەردەن جاۋاپ الۋدى سۇرادى. ال شەتەلگە قاشىپ كەتكەن ەلوردا اكىمىنىڭ بۇرىنعى ورىنباسارى قانات سۇلتانبەكوۆ پەن "استانا LRT" باسقارماسىنىڭ ءتوراعاسى تالعات اردان سوتتا جاۋاپ بەرمەسە، ءىستىڭ انىق-قانىعىن انىقتاۋ قيىن.
ادۆوكاتتاردىڭ ويىنشا، قۇقىق قورعاۋ ورگاندارى حالىقارالىق ىزدەۋدە جۇرگەندەردى ىزدەپ جاتقان جوق. ساۋلە اقاتوۆانىڭ ءوتىنىشىن باسقا ادۆوكاتتار دا قولدادى. ال پروكۋرور ارسەن بەگالين جوعارى لاۋازىمدى شەنەۋنىكتەردى سوتقا شاقىرۋعا قارسى بولدى.
"ونداي ءوتىنىش سوتتىڭ ءبىرىنشى ساتىسىندا جاريالانعان. ول ادامداردان جاۋاپ الۋدىڭ قاجەتى جوق دەپ سانايمىن. سەبەبى ءىس بويىنشا بارلىق دالەل قاراستىرىلدى"، – دەدى پروكۋرور بەگالين.
ايتا كەتەلىك LRT قۇرىلىسىنا بولىنگەن قارجىنى جىمقىرۋ ءىسى بويىنشا العاشقى سوت وتىرىسى 2020 جىلى 29 قازاندا ءوتتى. جەتى ادام 5،8 ميلليارد تەڭگەنى جىمقىرعانى ءۇشىن ايىپتالدى.
ال ەلوردا اكىمىنىڭ بۇرىنعى ورىنباسارى قانات سۇلتانبەكوۆ پەن "استانا LRT" ج ش س بۇرىنعى باسشىسى تالعات اردان حالىقارالىق ىزدەۋدە ءجۇر.
2013 جىلى ەكس-پرەزيدەنت نۇرسۇلتان نازاربايەۆ LRT قۇرىلىسى تىم قىمباتقا تۇسەتىنىن مالىمدەدى. بىرنەشە جىلدان كەيىن قىتايلىق ينۆەستورلار كەلدى. ال 2019 جىلى شىلدە ايىندا قاسىم-جومارت توقايەۆ جەڭىل رەلستى كولىك قۇرىلىسىن سىنعا الىپ، وسى جوبانىڭ تيىمدىلىگىنە سەنبەيتىنىن ايتتى.
بيىلعى جىلدىڭ ماۋسىم ايىندا ەلوردا اكىمى التاي كولگىنوۆ LRT قۇرىلىسىنىڭ قايتا جاندانعانىن مالىمدەدى. LRT-نى تولىعىمەن اياقتاۋ ءۇشىن قوسىمشا 1 ميلليارد دوللار قاجەت.
وسى ساتتە:
https://dalanews.kz/news/67610-taldykol-kolding-batpaqty-emes-taza-zhe
