Belgili qazaqtildi bloger Aleksei Lodochnikov sý tasqynynan zardap shekkenderge kómek kórsetý úshin halyqtan "aqsha jinaityn" qazaqstandyq blogerlerdiń shynaiylyǵyna kúmán keltiredi, dep habarlaidy Dalanews.kz.
“Qazirgi ýaqytta elimizdiń kóptegen óńiri men qalasynda sý tasqyny bolyp jatyr. Osyǵan bailanysty árbir ekinshi bloger “sbor” ashady. Keshe ǵana osy blogerlerdiń barlyǵy jinalyp, video túsirip, “Qiyn-qystaý qily zamanda” ánin qoiyp, “osyndai qysyltaiań mezgilde bir-birimizge kómekteseiik, osyǵan bailanysty aqsha jinaýdy bastaimyz” deidi.
Nelikten bul “sborlar” ashylady, men osyny túsinbeimin. Úkimet bárin jasaidy, Toqaevtyń ózi “biz bárine kómektesemiz, bárine úi salamyz, shyǵyndardyń bárin óteimiz jáne t.b.” dedi. Eldiń kóptegen iri kásiporny milliardtaǵan aqsha bóledi. BI Group úilerdi salamyz deidi. Meniń oiymsha, bul - jetkilikti, - dedi Lodochkinov áleýmettik jelidegi paraqshasynda.
Ol blogerlerge elden aqsha jinamai, óz qarajattaryn aýdarýdy usyndy.
“Blogerler kedei adamdar emes dep aita alamyn. Eger siz olardyń Instagram paraqshalaryn kórseńiz, onda keibireýlerinde bes kólikten bar, al endi biri keide milliondaǵan jáne milliardtaǵan aqsha tabatynymen maqtanady. Onyń ornyna, barlyq bloger, ózara aqsha jinap, “bul barlyq blogerdiń atynan halyqqa kómek bolsyn” dep aityńyz, sonda durys bolady”, - dedi Lodochnikov.
Sondai-aq Aleksei jinalǵan aqshanyń esebi týraly pikir bildirdi.
“Bir kezderi sizderdiń barlyǵyńyz, blogerler, giv arqyly aqsha jinadyńyzdar. Onyń esebi de joq, eshteńe joq. Olar: “biz 5 million, 10 million teńge jinadyq» deidi. Biraq olardyń qansha jinaǵanyn eshkim bilmeidi. Bulai bolmaidy! Bizde “Qazaq halqyna”, “Biz birgemiz” qorlary bar. Meniń oiymsha, bul kómek úshin jetkilikti. Jalpy, mundai jylý jinaý degendi qoiý kerek, buǵan Úkimet te ábden úirenip qalǵan, eger birdeńe bolsa, onda halyqtyń ózi bir-birine kómektesedi dep. Bul meniń - jeke pikirim”, - dep qorytyndylady Lodochnikov.
