Depýtat Elnur Beisenbaev premer-ministr Oljas Bektenovke saýal joldap, kólikti saqtandyrý qymbattaǵanyna ashyndy, dep habarlaidy Dalanews.kz.
Ol biyl 7 sáýirden bastap óńirler boiynsha saqtandyrý premiiasy negizsiz kúrt óskenin synǵa aldy.
"2023 jylmen salystyrǵanda alǵashqy saqtandyrý tarifi óńirlerde eki esege ósip, shamamen 78 myń teńge bolsa, al Astanada bul baǵa úsh esege ósip, 112 000 teńgege jetti. Iaǵni jańadan kóligin tirkegen astanalyq azamat endi 36 myń emes, 112 myń teńge tólese, almatylyqtar kemi 78 myń teńgege, al ózge óńir turǵyndary 40 myń teńgege jýyq somaǵa saqtandyrý polisin satyp alady", - dedi ol.
Sonymen qatar, depýtattyń pikirinshe, saqtandyrý koeffitsienti boiynsha azamattar arasynda teńsizdik týyndatatyn normaǵa jol berilgen.
"Qazaqstan azamaty alǵash ret saqtandyrý jasasa A klasy(1.8 koeffitsient), al sheteldik azamatqa birden joǵarǵy klass 13-shi sanat (0.5 koeffitsient) qoldanylady. Nátijesinde elimizdiń jas júrgizýshisi 80 000 teńge tólese, al sheteldik azamatqa birden 50 paiyz jeńildik beriledi. Aiyrmashylyǵy jer men kóktei! Bul Ata zańymyzda bekitilgen "zań aldyndaǵy teńdik" printsipin (12-bap) óreskel buzyp otyr", - dedi depýtat.
Elnur Beisenbaev mototsikl, skýter jáne moped júrgizýshileri kólik ielerimen bir sanatta qarastyrylǵanyn aitty.
"Bul da qisynsyz. Máselen 2023 jyly skýter júrgizýshisi 7 myń teńge tólese, 2025 jylǵy 7 sáýirden bastap ol shamamen 50 myń teńgege deiin ósip otyr. Mundai jaǵdai jastar men kýrer retinde jumys isteitin tabysy tómen azamattardyń qaltasyna edáýir salmaq salatyny aitpasa da túsinikti. Endi skýterdiń baǵasymen shamalas saqtandyrý tarifin jas azamattar múldem almaý qaýpi týyndap otyr", - deidi ol.
Sonymen qatar, onyń sózinshe, bul ózgerister Kólik ministrliginiń, Parlament depýtattarynyń qatysýynsyz júzege asqan, al bul óz kezeginde saqtandyrý kompaniialarynyń múddelerine lobbi jasaý yqtimaldyǵyn kórsetedi.
"Eger tarifter 20-30%-ǵa kóterilse, bul qisyndy ári ádil bolar edi. Alaida tarifter 200%-ǵa deiin óskenin kórip otyrmyz. Bul Qazaqstandaǵy júrgizýshiler tarapynan áleýmettik narazylyq týǵyzýy múmkin.
Eldegi halyqtyń úshten biriniń taǵdyryna tikelei qatysty máseleni agenttiktiń osyǵan jaýapty mekemelermen, júrgizýshiler qaýymdastyǵymen talqylamastan, bir jaqty qabyldaýyn qalai túsinýge bolady?! Kólik ministrligi qaida qaraǵan? Bul jóninde byltyr depýtattyq saýal da joldaǵan bolatynmyn. Jyl basynda saqtandyrý boiynsha Úkimetke zań jobasyn da qorytyndyǵa jiberdik. Bul da eskerilmegen.
Aldaǵy ýaqytta san myńdaǵan júrgizýshi osyǵan qatysty máseleni tótesinen qoiyp, kóterilse, oǵan kim jaýap beredi?!" - dedi ol.
