دەپۋتات ەلنۇر بەيسەنبايەۆ پرەمەر-مينيستر ولجاس بەكتەنوۆكە ساۋال جولداپ، كولىكتى ساقتاندىرۋ قىمباتتاعانىنا اشىندى، دەپ حابارلايدى Dalanews.kz.
ول بيىل 7 ساۋىردەن باستاپ وڭىرلەر بويىنشا ساقتاندىرۋ پرەمياسى نەگىزسىز كۇرت وسكەنىن سىنعا الدى.
"2023 جىلمەن سالىستىرعاندا العاشقى ساقتاندىرۋ ءتاريفى وڭىرلەردە ەكى ەسەگە ءوسىپ، شامامەن 78 مىڭ تەڭگە بولسا، ال استانادا بۇل باعا ءۇش ەسەگە ءوسىپ، 112 000 تەڭگەگە جەتتى. ياعني جاڭادان كولىگىن تىركەگەن استانالىق ازامات ەندى 36 مىڭ ەمەس، 112 مىڭ تەڭگە تولەسە، الماتىلىقتار كەمى 78 مىڭ تەڭگەگە، ال وزگە ءوڭىر تۇرعىندارى 40 مىڭ تەڭگەگە جۋىق سوماعا ساقتاندىرۋ ءپوليسىن ساتىپ الادى"، - دەدى ول.
سونىمەن قاتار، دەپۋتاتتىڭ پىكىرىنشە، ساقتاندىرۋ كوەففيسيەنتى بويىنشا ازاماتتار اراسىندا تەڭسىزدىك تۋىنداتاتىن نورماعا جول بەرىلگەن.
"قازاقستان ازاماتى العاش رەت ساقتاندىرۋ جاساسا ا كلاسى(1.8 كوەففيسيەنت)، ال شەتەلدىك ازاماتقا بىردەن جوعارعى كلاسس 13ء-شى سانات (0.5 كوەففيسيەنت) قولدانىلادى. ناتيجەسىندە ەلىمىزدىڭ جاس جۇرگىزۋشىسى 80 000 تەڭگە تولەسە، ال شەتەلدىك ازاماتقا بىردەن 50 پايىز جەڭىلدىك بەرىلەدى. ايىرماشىلىعى جەر مەن كوكتەي! بۇل اتا زاڭىمىزدا بەكىتىلگەن "زاڭ الدىنداعى تەڭدىك" ءپرينسيپىن (12-باپ) ورەسكەل بۇزىپ وتىر"، - دەدى دەپۋتات.
ەلنۇر بەيسەنبايەۆ موتوسيكل، سكۋتەر جانە موپەد جۇرگىزۋشىلەرى كولىك يەلەرىمەن ءبىر ساناتتا قاراستىرىلعانىن ايتتى.
"بۇل دا قيسىنسىز. ماسەلەن 2023 جىلى سكۋتەر جۇرگىزۋشىسى 7 مىڭ تەڭگە تولەسە، 2025 جىلعى 7 ساۋىردەن باستاپ ول شامامەن 50 مىڭ تەڭگەگە دەيىن ءوسىپ وتىر. مۇنداي جاعداي جاستار مەن كۋرەر رەتىندە جۇمىس ىستەيتىن تابىسى تومەن ازاماتتاردىڭ قالتاسىنا ەداۋىر سالماق سالاتىنى ايتپاسا دا تۇسىنىكتى. ەندى سكۋتەردىڭ باعاسىمەن شامالاس ساقتاندىرۋ ءتاريفىن جاس ازاماتتار مۇلدەم الماۋ ءقاۋپى تۋىنداپ وتىر"، - دەيدى ول.
سونىمەن قاتار، ونىڭ سوزىنشە، بۇل وزگەرىستەر كولىك مينيسترلىگىنىڭ، پارلامەنت دەپۋتاتتارىنىڭ قاتىسۋىنسىز جۇزەگە اسقان، ال بۇل ءوز كەزەگىندە ساقتاندىرۋ كومپانيالارىنىڭ مۇددەلەرىنە لوببي جاساۋ ىقتيمالدىعىن كورسەتەدى.
"ەگەر تاريفتەر 20-30%-عا كوتەرىلسە، بۇل قيسىندى ءارى ءادىل بولار ەدى. الايدا تاريفتەر 200%-عا دەيىن وسكەنىن كورىپ وتىرمىز. بۇل قازاقستانداعى جۇرگىزۋشىلەر تاراپىنان الەۋمەتتىك نارازىلىق تۋعىزۋى مۇمكىن.
ەلدەگى حالىقتىڭ ۇشتەن ءبىرىنىڭ تاعدىرىنا تىكەلەي قاتىستى ماسەلەنى اگەنتتىكتىڭ وسىعان جاۋاپتى مەكەمەلەرمەن، جۇرگىزۋشىلەر قاۋىمداستىعىمەن تالقىلاماستان، ءبىر جاقتى قابىلداۋىن قالاي تۇسىنۋگە بولادى؟! كولىك مينيسترلىگى قايدا قاراعان؟ بۇل جونىندە بىلتىر دەپۋتاتتىق ساۋال دا جولداعان بولاتىنمىن. جىل باسىندا ساقتاندىرۋ بويىنشا ۇكىمەتكە زاڭ جوباسىن دا قورىتىندىعا جىبەردىك. بۇل دا ەسكەرىلمەگەن.
الداعى ۋاقىتتا سان مىڭداعان جۇرگىزۋشى وسىعان قاتىستى ماسەلەنى توتەسىنەن قويىپ، كوتەرىلسە، وعان كىم جاۋاپ بەرەدى؟!" - دەدى ول.
