Erekeńe aıtar bir taǵy bir ýájimiz bar. Búginde Ulttyq arnanyń quramynda birneshe telearna qosaqtalǵan. Solardyń biri – «Balapan» arnasy. Búldirshindermizge tálim-tárbıe beretin mundaı arna elimiz úshin asa qajet ekenin bárimiz túsinemiz.
Aldaǵy ýaqytta «Balapan» arnasy Nickelodeon men TiJi-diń orynyn basý úshin kóp jumys isteýi kerek? Qazir «Balapandy» aýyldyń balalary ǵana qaraıdy, al qalanyń balalary joǵaryda aıtqan eki arnanyń turaqty «kórermeni» desek qatelespeımiz. Bizder aýyl men qaladaǵy bala bitkenniń bári «Balapannyń» kórermeni bolǵanyn qalaımyz. Árıne, bul úshin sheteldik arnalarmen qalyspaı, básekelesip jumys isteý kerek.
Bul rette «Balapan» arnasy qazaqy ómirge laıyq, zamanaýı múltfılmder túsirýi kerek.
Menińshe, «Balapan» arnasynyń qazirgi basshylǵy mundaı bıik deńgeıde jumys isteı almaýda. «Balapan» arnasy degende onyń dırektory Láılá Sultanqyzy esimizge túsedi. Al Láılá Sultanqyzy esimizge túskende ánshi-ártisterdi (bir ret qyztekeni taýyp, habar jasaǵanyn da eldiń esinde) jınap alyp, «Áıel baqytynda» áńgime soǵyp otyrǵan shoý-júrgizýshi eske túsedi. Qudy bir qys bolyp, turyp jadyrap jaz shyqqandaı ári-sári kúıge túsesiń. Osyndaı bir-birine kereǵar kórinister árqaısymyzdyń oı-sanamyzda sharlap júrgeni jasyryn emes.
Láılá hanym «Áıel baqyty» baǵdarlamasy sátti shyǵýy úshin bar kúsh-jigerin jumysap, eńbekteninip júrgenin joqqa shyǵarmaımyz. Iá, qoǵamda suranys bolǵannan keıin mundaı baǵdarlamanyń bolýy zańdy. «Áıel baqytynyń» sharýasymen júgirgende Láılá hanymnyń «Balapan» úshin «bas aýyrtatyndaı» múmkindigi de bolma ma? Jaraıdy, múmkindigi jetti delik. Biraq halyq aldyndaǵy moraldyq kelbetin qaıda qoıamyz? Osy jaǵyn oılaǵan adam bar ma?
Sondyqtan «Balapan» arnasyn damytý úshin onyń basqarý tizginin balalardyń tanym-túsinigin, psıhologıasyn jetik biletin mamanǵa tapsyrý kerek. Áıtpese «Balapan» osy bıiginen ary qaraı kóterile almaıtyny anyq. Bul rette biz áriptesimiz Láılá Sultanqyzynyń qyzmetine kóz alartyp, muqataıyq degen oıymyz joq.
Sóz joq, Láılá hanym juldyzdarǵa qatysty baǵdarlamalardy daıyndaýda myqty maman. Al balalarǵa qatysty arnanyń basshylyǵynda balalardyń janyn túsinetin maman otyrýy kerek. Áriptesimiz eki keminiń quıryǵyn ustaý qashanda qaýipti ekenin biz aıtpasaq ta, ózi de biledi.
Áńgime arasynda «Balapan» balalarǵa arnalǵan myqty arnamen básekelesýi úshin tartymdy múltfılmder túsirýi kerek ekenin aıttyq. Qazirgi tańda memlekettik múltfılm túsirýge bólgen qarjysyn «Qazaqfılm» ıgeredi. Menińshe, sol qarjyny «Balapanǵa» burý kerek. Bul úshin «Balapannyń» basshysy bıik minbelerde oıyn ashyq aıtyp, isinde tabandylyq tanytatyn qaıratker adam bolýy tıis. Al mundaı harızma Láılá hanymnyń boıynda bar dep eshkim aıta almasy anyq.
Máseleniń máni túsinikti bolýy úshin kóz aldyńyzǵa myna bir kórinisti elestetińizshi, Mádeneıt mınıstri Arystanbek Muhamedıauly men «Qazaqfılmniń» dırektory Baqyt Qaıyrbekovtyń aldynda memlekettiń múltfılm túsirýge bólingen qarjysyn «Balapanǵa» baǵyttaý kerek ekenin Láılá hanym talap etip jatyr delik. Láılá Sultanqyzy qansha tanymal bolsa da onyń qolynan mundaı is kelmesin anyq. Sondyqtan Erlan Qarın bizdiń usynysymyzǵa mán berip, «Balapannyń» basshysyn aýystyryp jatsa, osy bir kórinisti oı eleginen ótkizip alsa jaqsy bolar edi.
Nurlan JUMAHAN
(maqala avtordyń Feısbýktaǵy paraqshasynan alyndy)
