Reseidiń syrtqy ister ministri Sergei Lavrov Qazaqstan prezidenti Qasym-Jomart Toqaevtyń aýmaqtyq tutastyq týraly málimdemesine kelispeitinin ashyq aitty. Bul týraly ol «Kommersant» basylymyna bergen suhbatynda málimdedi, dep habarlaidy Dalanews.kz.
Qasym-Jomart Toqaev buǵan deiin birneshe ret «eger memleketterdiń aýmaqtyq tutastyǵy saqtalmasa, bul jańa memleketterdiń paida bolýyna jáne olardyń arasyndaǵy qaqtyǵystarǵa alyp keledi» degen pikir bildirgen. Alaida Lavrov bul kózqaraspen kelise qoimaidy. Onyń aitýynsha, tek aýmaqtyq tutastyqty ǵana alǵa tartý jetkiliksiz – BUU Jarǵysynda basqa da mańyzdy qaǵidalar bar.
– BUU negizinde tek aýmaqtyq tutastyq emes, sonymen qatar halyqtardyń ózin-ózi anyqtaý quqyǵy da bar. Bul ustanymdardy qatar eskerý kerek, – deidi Lavrov.
Ol Toqaevtyń atalǵan málimdemesin esinde saqtaǵanyn aityp, keiin bul máselede Resei óz ustanymyn Qazaqstan jaǵyna jetkizgenin jetkizdi. Mysal retinde ol dekolonizatsiia (otarsyzdandyrý) protsesin keltirdi.
– Aýmaqtyq tutastyq tek halyqtyń atynan sóileýge tolyq quqyǵy bar úkimetterge qatysty saqtalýy tiis. Al koloniialyq memleketter – Parij, London, Lissabon, Madrid – eshqashan otar elderdiń búkil halqynyń múddesin bildirgen joq. Sondyqtan da otarsyzdaný protsesi halyqaralyq quqyq talaptaryna sai ótti, – dedi Lavrov.
Toqaevtyń Peterbor forýmyndaǵy málimdemesi
Aita keteiik, bul pikirtalas 2022 jyly maýsymda bastalǵan bolatyn. Peterbor ekonomikalyq forýmynda Qasym-Jomart Toqaev Resei prezidenti Vladimir Pýtinniń kózinshe Donetsk pen Lýgansk halyq respýblikalaryn «kvazimemlekettik qurylymdar» dep ataǵan edi. Bul málimdeme Resei qoǵamynda qyzý pikirtalas týdyrǵan bolatyn.
