رەسەيدىڭ سىرتقى ىستەر ءمينيسترى سەرگەي لاۆروۆ قازاقستان پرەزيدەنتى قاسىم-جومارت توقايەۆتىڭ اۋماقتىق تۇتاستىق تۋرالى مالىمدەمەسىنە كەلىسپەيتىنىن اشىق ايتتى. بۇل تۋرالى ول «كوممەرسانت» باسىلىمىنا بەرگەن سۇحباتىندا مالىمدەدى، دەپ حابارلايدى Dalanews.kz.
قاسىم-جومارت توقايەۆ بۇعان دەيىن بىرنەشە رەت «ەگەر مەملەكەتتەردىڭ اۋماقتىق تۇتاستىعى ساقتالماسا، بۇل جاڭا مەملەكەتتەردىڭ پايدا بولۋىنا جانە ولاردىڭ اراسىنداعى قاقتىعىستارعا الىپ كەلەدى» دەگەن پىكىر بىلدىرگەن. الايدا لاۆروۆ بۇل كوزقاراسپەن كەلىسە قويمايدى. ونىڭ ايتۋىنشا، تەك اۋماقتىق تۇتاستىقتى عانا العا تارتۋ جەتكىلىكسىز – بۇۇ جارعىسىندا باسقا دا ماڭىزدى قاعيدالار بار.
– بۇۇ نەگىزىندە تەك اۋماقتىق تۇتاستىق ەمەس، سونىمەن قاتار حالىقتاردىڭ ءوزىن-وزى انىقتاۋ قۇقىعى دا بار. بۇل ۇستانىمداردى قاتار ەسكەرۋ كەرەك، – دەيدى لاۆروۆ.
ول توقايەۆتىڭ اتالعان مالىمدەمەسىن ەسىندە ساقتاعانىن ايتىپ، كەيىن بۇل ماسەلەدە رەسەي ءوز ۇستانىمىن قازاقستان جاعىنا جەتكىزگەنىن جەتكىزدى. مىسال رەتىندە ول دەكولونيزاسيا (وتارسىزداندىرۋ) پروسەسىن كەلتىردى.
– اۋماقتىق تۇتاستىق تەك حالىقتىڭ اتىنان سويلەۋگە تولىق قۇقىعى بار ۇكىمەتتەرگە قاتىستى ساقتالۋى ءتيىس. ال كولونيالىق مەملەكەتتەر – پاريج، لوندون، ليسسابون، مادريد – ەشقاشان وتار ەلدەردىڭ بۇكىل حالقىنىڭ مۇددەسىن بىلدىرگەن جوق. سوندىقتان دا وتارسىزدانۋ پروسەسى حالىقارالىق قۇقىق تالاپتارىنا ساي ءوتتى، – دەدى لاۆروۆ.
توقايەۆتىڭ پەتەربور فورۋمىنداعى مالىمدەمەسى
ايتا كەتەيىك، بۇل پىكىرتالاس 2022 جىلى ماۋسىمدا باستالعان بولاتىن. پەتەربور ەكونوميكالىق فورۋمىندا قاسىم-جومارت توقايەۆ رەسەي پرەزيدەنتى ۆلاديمير ءپۋتيننىڭ كوزىنشە دونەسك پەن لۋگانسك حالىق رەسپۋبليكالارىن «كۆازيمەملەكەتتىك قۇرىلىمدار» دەپ اتاعان ەدى. بۇل مالىمدەمە رەسەي قوعامىندا قىزۋ پىكىرتالاس تۋدىرعان بولاتىن.
