Saltanat Núkenovanyń aǵasy Aıtbek Amangeldiniń advokaty Damır Ishmametov suhbat berip, Bıshimbaev áıelin ne úshin óltirgenin aıtty, - dep habarlaıdy Dalanews.kz.

«Qylmystyń maqsatyna qatysty aıtar bolsaq, bul jańalyqtarda da aıtyldy, sot jaryssózinde de aıttyq, qylmys sebebi – qyzǵanysh. Onyń jaǵdaıynda ózi oıdan qurastyryp alǵan qyzǵanysh. Ol bir nárseni 20 mınýtta 175 ret qaıtalaǵan. Áıeli elimizge belgili kásipkermen kóńildes bolǵan dep shyǵaryp alǵan. Iaǵnı bir mınýtta bir sóılemdi toǵyz ret aıtqan. Saltanatta ár mınýt saıyn jańa jaraqattar paıda bolǵan. Iaǵnı kıimderin sheship, tizerletip otyrǵyzyp, urǵan. Qylmys jasaýynyń sebebi sol – qyzǵanysh. Keıbir vıdeolarda marqumnyń jeke ómiri kórsetilgendikten olar kópke jarıa bolmady. Qalǵanynyń bári kórsetildi», - deıdi advokat Aman Tasyǵanǵa bergen suhbatynda.

Damır Ishmametov Qýandyq Bıshimbaevtyń basqa adamdarymen, sonyń ishinde, psıhologymen sóılesken hattarynan onyń narsıs ekenin ańǵarýǵa bolatynyn aıtady.

Aıta keteıik, buǵan deıin Ádilet vıse-mınıstri Botagóz Jaqselekova Bıshimbaevtyń merziminen buryn bostandyqqa shyǵýyna qatysty suraqqa jaýap bergen bolatyn. 

Jaqselekovanyń sózinshe, merziminen buryn bostandyqqa shyǵý máselesi zań boıynsha reglamenttelgen. 

"Ol jasalǵan qylmystyń aýyrlyǵyna baılanysty. Jalpy bul máseleni sot sheshedi. Qylmys jasaǵany úshin sottalǵan adam ótinishti (hodataıstvo) túzeý mekemesinde bere alady", - dedi Botagóz Jaqselekova Senat kýlýarynda.

Mınıstrdiń orynbasary Qýandyq Bıshimbaevtyń isi boıynsha sottyń úkimi zańdy kúshine enbegenin atap ótti.

"(Merziminen buryn túrmeden shyǵý) múmkindigi jazasyn ótep jatqan adam oń sıpatqa ıe bolǵanda beriledi. Asa aýyr qylmys boıynsha toqtalaıyn. Munda eń az merzim jazanyń úshten ekisin keshirýge bolady. Iá, munda jábirlenýshi taraptyń kelisimi kerek. Birinshiden, (merziminen buryn túrmeden shyǵarý) sheshimin sot shyǵarady. Ekinshiden, sot úkiminiń zańdy kúshinen engenin kútýimiz kerek", - dedi vıse-mınıstr.

Eske salaıyq, 13 mamyrda atyshýly Bıshimbaev isine qatysty sot úimi shyqqan bolatyn. Áıelin uryp óltirdi degen kúdikke ilingen Qýandyq Bıshimbaev 24 jylǵa sottalsa, qylmysty jasyryp qaldy degen kúdikke ilingen inisi 4 jylǵa bas bostandyǵynan aıyryldy.