Qonaev qalasynyń ortalyq alańynda Otan qorǵaýshy kúnine arnalǵan saltanatty is-shara ótti. Merekelik sharalarǵa Almaty oblysynyń ákimi Marat Sultanǵaziev, Qonaev garnizonynyń bastyǵy, gvardiia polkovnigi Beibit Amanqaliev, Aýǵan soǵysynyń ardagerleri, ózge de áskeri qaqtyǵystarǵa qatysqan ardagerler, Qarýly Kúshterdiń ardagerleri, Qonaev garnizonynyń áskeri qyzmetshileri, áskeri-patriottyq klýbtardyń tárbielenýshileri men qala turǵyndary qatysty, dep habarlaidy Dalanews.kz.
Jinalǵan qaýym ortalyq alańda ornatylǵan eńseli sahnadaǵy keń ekrannan Astana qalasyndaǵy áskeri paradtyń ashylý saltanatyn tamashalap, Memleket basshysynyń quttyqtaýyn tikelei efirde tyńdady. Memleket basshysy qazaqstandyqtardy merekemen quttyqtap, eldegi beibitshilik pen qaýipsizdikti qamtamasyz etýdegi Qarýly Kúshterdiń mańyzyn atap ótti.
Is-shara barysynda Almaty oblysynyń ákimi Marat Sultanǵaziev quttyqtaý sóz sóiledi. Ol Prezidenttiń tapsyrmasymen elimizdiń Qarýly Kúshterinde júieli jańǵyrtý júrgizilip jatqanyn atap ótti: – Memleket basshysynyń tapsyrmasyna sáikes Qazaqstan Respýblikasynyń Qarýly Kúshteri jańǵyrý ústinde. Olar ulttyq qaýipsizdiktiń kepiline, qoǵamnyń tiregine ainalýda. Bizdiń Otan qorǵaýshylarymyz tek shekarany kúzetip qana qoimai, azamattyq kelisimdi nyǵaitýǵa jáne jastardy otansúigishtikke tárbieleýge zor úles qosyp keledi, – dedi óńir basshysy.
Merekelik shara aiasynda marapattaý rásimi ótti. Almaty oblysy ákiminiń atynan Qonaev garnizonynyń jáne Ulttyq ulannyń jiyrma shaqty áskeri qyzmetshisine alǵys hattar tabystaldy. Marapattalǵandar arasynda polkovnik Jeńisjan Baijan, podpolkovnikter Daniiar Mamenov pen Berik Elikbaev, gvardiia maiory Darhan Jánsikbaev, maior Nurlan Ojarov, leitenant Laýra Bekbolatova jáne serjant Eldos Qarbozov pen ózge de qyzmetkerler bar.
Merekelik kóńil kúidi shyǵarmashylyq ujymdardyń qatysýymen ótken kontserttik baǵdarlama jalǵastyryp, is-sharaǵa erekshe sán men jylýlyq syilady.
Osy kúni Almaty oblysynyń ákimi Marat Sultanǵaziev Uly Otan soǵysynyń ardagerleri Táńirbergen Tolǵanbaev pen Fiodor Emelianovich Kovaliovke arnaiy baryp, kele jatqan Jeńistiń 80 jyldyǵymen quttyqtady. Óńir basshysy ardagerlerge mereitoilyq medal, 5 million teńge jáne Qonaev qalasynan jańa páter kiltterin tabystady. Oblys ákimi soǵys jyldaryndaǵy erlikteri úshin shynaiy alǵysyn bildirip, ardagerlerge qamqorlyq kórsetý – memlekettik saiasattyń basym baǵyty ekenin atap ótti.
Sonymen qatar, №20030 áskeri bólim aýmaǵynda zamanaýi áskeri tehnika kórmesi uiymdastyryldy. Oblys ákimi bólimniń materialdyq-tehnikalyq bazasymen tanysyp, jeke qurammen áńgimelesip, bólimniń jabdyqtalý deńgeiine joǵary baǵa berdi.
Qonaev qalasynda ótken Otan qorǵaýshy kúni birlik pen el tynyshtyǵyn kúzetken jandarǵa degen qurmet rýhynda ótti. Merekelik sharalar armiia men halyq arasyndaǵy bailanysty nyǵaitýdyń – Qazaqstannyń ornyqty damýynyń kepili ekenin taǵy bir márte kórsetti.
