Qarapaıym sýdyń adam aǵzasyna paıdasyn barlyq derlik adam biledi. Alaıda kúndelikti qarbalas ómirde kópshilik adam shóldeý sezimine mán bermeıdi nemese sýdyń ornyna shaı, kofe, tátti sýsyndar ishedi. Al keıbireýlerge qarapaıym sýdyń dámi unamaı, ony mıneraldy nemese gazdalǵan sýmen almastyrady. Biraq kúndelikti qajetti sý mólsherin ishý - durys tamaqtanýdyń mańyzdy bóligi ekenin umytpaǵan jón. Endeshe,mamandar qarapaıym sýdyń dámi unamasa, oǵan birneshe tilim lımon qosyp ishýge keńes beredi. Bul sýdyń dámin ózgertedi ári kúndelikti jetkilikti mólsherde suıyqtyq ishýge kómektesedi, dep habarlaıdy Dalanews.kz.
Lımon qosylǵan sýdyń adam aǵzasyna paıdasy
As qorytýdy jaqsartady
Tamaqtan 30 mınýt buryn bir staqan sýǵa bir shaı qasyq lımon shyrynyn qosyp ishý asqazan sóliniń bólinýin yntalandyrady. Bul taǵamnyń durys qorytylyp, sińýine jáne as qorytý fermentteriniń túzilýine kómektesedi.
Imýnıtetti nyǵaıtady
Lımon quramynda aǵzaǵa vırýstar men qabynýǵa qarsy kúreste kómektesetin S dárýmeni kóp. Ol ımýnıtetti kúsheıtedi, súıekterdiń qalyptasýyna, jaranyń jazylýyna, teri men jasýsha jaǵdaıynyń jaqsarýyna áser etedi.
Holesterın deńgeıin tómendetedi
Lımon qosylǵan sý qan tamyrlarynyń qabyrǵalaryn zıandy holesterınnen tazartýǵa kómektesedi. Bul júrek talmasynyń, ınsýlt pen aterosklerozdyń aldyn alady jáne qan tamyrlarynyń serpindiligin arttyrady.
Qartaıýdy baıaýlatady
Sıtrýs quramyndaǵy antıoksıdanttar aǵzadaǵy bos radıkaldarmen kúresedi. Olar jasýshalardy zaqymdap, teriniń erte qartaıýyna sebep bolady. Antıoksıdanttardyń jetkiliksizdigi kezinde teri bozaryp, qurǵap, ájimder aıqyndala bastaıdy. Muny lımon qosylǵan sý ishý arqyly aldyn alýǵa bolady.
Qandaǵy qantty turaqtandyrady
Lımon sýy holesterındi azaıtyp qana qoımaı, qandaǵy qant deńgeıin de retteıdi. Bul 2-tıptegi qant dıabeti men semizdiktiń aldyn alýǵa kómektesedi.
Ókpe qaterli isiginiń aldyn alýǵa yqpal etedi
Lımon quramynda bıologıalyq belsendi zattar — bıoflavonoıdtar bar (zeaksantın, álfa jáne beta-karotın, lúteın, krıptoksantın). Olar ókpe obyrynyń paıda bolý qaýpin tómendetedi.
Táttige degen tábetti túsiredi
Lımon sýy qandaǵy qant deńgeıin turaqtandyryp, tátti, maıly jáne qýyrylǵan taǵamdarǵa degen qumarlyqty azaıtady. Sebebi qandaǵy glúkoza kúrt kóterilgende aǵza artyq kalorıany tez alýǵa tyrysady. Al bul artyq salmaq, dıabet, teri problemalary jáne zat almasý buzylystaryna ákelýi múmkin.
Sergitedi
Tańerteń lımon sýyn ishý aǵzany oıatyp, asqazan jumysyn belsendiredi. Bul mıǵa «tańǵy as ishetin ýaqyt jaqyndady» degen belgi beredi. Sol sebepti lımon qosylǵan sý keıde kofeden de jaqsy sergitedi jáne kóńil kúıdi kóteredi.
Kimderge lımon qosylǵan sý ishýge bolmaıdy?
Taza lımon shyrynyn, tipti, deni saý adamdardyń ózine ishýge bolmaıdy. Óıtkeni ol aýyz qýysynyń, óńesh pen asqazannyń shyryshty qabyǵyn titirkendirip, zaqymdaýy múmkin.
Kez kelgen ónimge sekildi lımon qosylǵan sýǵa da qarsykórsetilim bar. Lımon shyrynynda qyshqyl kóp bolǵandyqtan, ol asqazan-ishek joldary aýrýlary bar adamdarǵa qaýipti.
Lımon shyrynyn asqazan nemese ash ishek jarasy, joǵary qyshqyldy gastrıt, kolıt, pankreatıt kezinde ishýge qatań tyıym salynady.
Sonymen qatar taza lımon shyryny tis emalin zaqymdaıdy,sondyqtan lımon qosylǵan sý ishkennen keıin de aýyzdy taza sýmen shaıyp alý qajet.
Taǵy bir mańyzdy jaıt — lımon kúshti alergen. Sondyqtan ony nemese onyń shyrynyn shamadan tys qoldaný alergıalyq reaksıa týdyrýy múmkin.
Eskertý: Bul materıal aqparattyq sıpatta berilgen. Ózdiginen emdelý qaýipti. Densaýlyǵyńyzǵa qatysty kez kelgen ózgeristi nemese jańa ónimdi rasıonǵa engizbes buryn dárigermen, dıetologpen nemese basqa da medısınalyq mamanmen keńesińiz.
