Qazirgi zamanda kópshilik adamnyń ómiri kompúter men keńse ústeliniń aınalasynda ótedi. Orta eseppen adam kúnine 7–9 saǵatqa deıin otyrady. Al ǵalymdardyń aıtýynsha, uzaq otyrý — jańa ǵasyrdyń «jasyryn indetine» aınalyp otyr, dep habarlaıdy Dalanews.kz

Mı qyzmeti baıaýlaıdy

Uzaq ýaqyt qozǵalyssyz otyrý qan aınalymyn báseńdetip, mıǵa otteginiń jetýin azaıtady. Nátıjesinde adam tez sharshaıdy, zeıin men este saqtaý qabileti tómendeıdi.

Júrek pen qan tamyrlaryna qaýip

Dene qozǵalysy shektelgen saıyn, holesterın deńgeıi ósip, qan qoıýlanady. Bul ınfarkt pen ınsýlt qaýpin arttyrady. Dúnıejúzilik densaýlyq saqtaý uıymy (DDU) kúnine 8 saǵattan artyq otyrý júrek-qan tamyr aýrýlaryn 15–20%-ǵa arttyratynyn anyqtaǵan.

Omyrtqa men býyn zardap shegedi

Túnimen uıyqtap, kúni boıy otyryp jumys isteý omyrtqaǵa qosarlanǵan salmaq túsiredi. Nátıjesinde bel, moıyn, ıyq aýrýlary, osteohondroz jáne qımyl shekteýleri paıda bolýy múmkin.

Artyq salmaq pen dıabet qaýpi

Qozǵalyssyz ómir salty zat almasýdy baıaýlatyp, kalorıanyń jınalýyna ákeledi. Bul semizdikke, 2-tıptegi qant dıabetine jáne zat almasý sındromyna jol ashady.

Ne isteý kerek?

Mamandardyń keńesi boıynsha:

• Ár 30–40 mınýt saıyn 5 mınýtqa ornyńyzdan turyp, azdap júrip, sozylý jattyǵýlaryn jasańyz;

• Múmkindik bolsa, jumys ornynda turyp jumys isteýge arnalǵan ústel qoldanyńyz;

• Túski úziliste qysqa serýenge shyǵyńyz;

• Aptasyna keminde 150 mınýt fızıkalyq belsendilikke ýaqyt bólińiz.