Áleýmettik jelide Aqtóbe oblysy ákimdiginiń qyzmetkerine konvert berip jatqan sátindegi video kópshiliktiń talqysyna túsip, daý týdyrǵan edi. Osy máselege bailanysty tergeý nátijesi belgili boldy, dep habarlaidy Dalanews.kz.
Bul oqiǵadan keiin "Aqtóbe" ÁKK Jańa jyl merekesine orai keibir qyzmetkerlerine negizgi ústemaqydan bólek, 2-3 jalaqy kóleminde qosymsha aqshalai syiaqy tabystady degen aqparat taraǵan bolatyn.
Tekserý barysynda videodaǵy er adamdardyń “Aqtóbe áleýmettik-kásipkerlik korporatsiiasy” AQ birinshi orynbasary men Aqtóbe oblysy ákimdiginiń indýstriialyq-innovatsiialyq damý basqarmasynyń burynǵy mamany ekeni anyqtaldy.
"Osy fakti negizinde tekseris júrgizgenin habarlaimyz. Tekserý barysynda qyzmetkerlerden túsiniktemeler alyndy. Quzyret sheginde barlyq mán-jai anyqtaldy. Qorytyndy nátijesi boiynsha barlyq syilyqaqy eńbek zańnamasy aiasynda berilgeni dáleldendi. Buǵan deiin áleýmettik jelide jariialanǵan aqparat rastalmady, iaǵni shyndyqqa janaspaidy. Sonymen qatar basqa da memlekettik organdar tarapynan tekserý júrgizilip jatqanyn habarlaimyz. Onyń nátijeleri týraly qosymsha habarlanady", - dedi "Aqtóbe" ÁKK basqarma tóraǵasynyń orynbasary Narek Gegamian.
Eske salaiyq, atalmysh video biyl qańtar aiynda qyzý talqyǵa tústi. Videony belgili quqyq qorǵaýshy Aiman Omarova áleýmettik jelidegi paraqshasynda jariialady. Zańgerdiń aitýynsha, konvertte aqsha bolǵan. Osy jaǵdaiǵa bailanysty arnaiy tekseris júrgizilgen bolatyn.
