الەۋمەتتىك جەلىدە اقتوبە وبلىسى اكىمدىگىنىڭ قىزمەتكەرىنە كونۆەرت بەرىپ جاتقان ساتىندەگى ۆيدەو كوپشىلىكتىڭ تالقىسىنا ءتۇسىپ، داۋ تۋدىرعان ەدى. وسى ماسەلەگە بايلانىستى تەرگەۋ ناتيجەسى بەلگىلى بولدى، دەپ حابارلايدى Dalanews.kz.
بۇل وقيعادان كەيىن "اقتوبە" اكك جاڭا جىل مەرەكەسىنە وراي كەيبىر قىزمەتكەرلەرىنە نەگىزگى ۇستەماقىدان بولەك، 2-3 جالاقى كولەمىندە قوسىمشا اقشالاي سىياقى تابىستادى دەگەن اقپارات تاراعان بولاتىن.
تەكسەرۋ بارىسىندا ۆيدەوداعى ەر ادامداردىڭ “اقتوبە الەۋمەتتىك-كاسىپكەرلىك كورپوراسياسى” اق ءبىرىنشى ورىنباسارى مەن اقتوبە وبلىسى اكىمدىگىنىڭ يندۋستريالىق-يننوۆاسيالىق دامۋ باسقارماسىنىڭ بۇرىنعى مامانى ەكەنى انىقتالدى.
"وسى فاكتى نەگىزىندە تەكسەرىس جۇرگىزگەنىن حابارلايمىز. تەكسەرۋ بارىسىندا قىزمەتكەرلەردەن تۇسىنىكتەمەلەر الىندى. قۇزىرەت شەگىندە بارلىق ءمان-جاي انىقتالدى. قورىتىندى ناتيجەسى بويىنشا بارلىق سىيلىقاقى ەڭبەك زاڭناماسى اياسىندا بەرىلگەنى دالەلدەندى. بۇعان دەيىن الەۋمەتتىك جەلىدە جاريالانعان اقپارات راستالمادى، ياعني شىندىققا جاناسپايدى. سونىمەن قاتار باسقا دا مەملەكەتتىك ورگاندار تاراپىنان تەكسەرۋ جۇرگىزىلىپ جاتقانىن حابارلايمىز. ونىڭ ناتيجەلەرى تۋرالى قوسىمشا حابارلانادى"، - دەدى "اقتوبە" اكك باسقارما ءتوراعاسىنىڭ ورىنباسارى نارەك گەگاميان.
ەسكە سالايىق، اتالمىش ۆيدەو بيىل قاڭتار ايىندا قىزۋ تالقىعا ءتۇستى. ۆيدەونى بەلگىلى قۇقىق قورعاۋشى ايمان وماروۆا الەۋمەتتىك جەلىدەگى پاراقشاسىندا جاريالادى. زاڭگەردىڭ ايتۋىنشا، كونۆەرتتە اقشا بولعان. وسى جاعدايعا بايلانىستى ارنايى تەكسەرىس جۇرگىزىلگەن بولاتىن.
