Senat depýtaty Marat Qojaev Kókshetaýda áieldi kólikpen qaǵyp óltirgen júrgizýshige qatysty qoǵamdaǵy rezonansqa pikir bildirdi, dep habarlaidy dalanews.kz.
Sońǵy kúnderi áleýmettik jelide jol apatyna kináli áieldiń kúieýi joǵary laýazymdy politsiia qyzmetkeri bolýy múmkin degen aqparat taraǵan bolatyn.
Osyǵan bailanysty jýrnalister Senat kýlýarynda Marat Qojaevtan pikir surady.
«Shynyn aitsam, bul tergeýge aralasqan joqpyn. Barlyǵy anyq kórinip tur. Oqiǵa videoǵa túsip qalǵan. Ol kim bolsa da, kúieýi kim bolsa da, qazir bizde “zań men tártip” qaǵidaty bar. Qandai qyzmet atqarǵanyna qaramastan, bári zań aiasynda quqyqtyq baǵa alady», - dedi senator.
Sonymen qatar Qojaev júrgizýshi áieldiń kúieýi rasynda qandai da bir laýazym iesi bolǵany týraly naqty aqparat joq ekenin aitty.
«Óte sumdyq jaǵdai. Áiel adam kólik júrgizýdi oqymaǵan, júrgizýshi kýáligi de bolmaǵan, eshqandai mashyǵy joq bola tura rólge otyrǵan», - dedi ol.
Eske salaiyq, buǵan deiin áleýmettik jelilerde Kókshetaýda bolǵan ólimge ákelgen jol apatynyń videosy taraǵan edi. Kadrlarda jol qiylysynda burylǵan jol talǵamaityn kólik áieldi qaǵyp ketkeni kórinedi.
Apattan keiin jábirlenýshi kóliktiń astynda qalǵan. Keiin onyń jalǵyzbasty ana ekeni belgili boldy.
Politsiia atalǵan fakt boiynsha qylmystyq is qozǵady. Keiinirek rólde otyrǵan áieldiń júrgizýshi kýáligi bolmaǵany anyqtalǵan.
