Pavlodar oblysynda jyl basynan beri boryshkerlerden 5 mlrd teńgeden astam aliment óndirildi. Balalary aldyndaǵy mindetin oryndamaǵan azamattardyń kóligi men jyljymaityn múlki tárkilenip, birqatary ákimshilik jáne qylmystyq jaýapqa tartyldy, dep habarlaidy dalanews.kz.
Bereshekti óndirip alý jumystaryna prokýratýra, politsiia, sot oryndaýshylary jáne jumyspen qamtý organdary jumyldyrylǵan. Osy kezeńde alimentten bólek, biýdjetke 1 mlrd teńge kólemindegi qaryz qaitarylǵan.
Boryshkerlerdi anyqtaý úshin "Kiber-sherif" júiesi de paidalanylǵan. Oǵan aliment tólemegen azamattarǵa tiesili 300-den astam kólik engizilip, sonyń 67-si arnaiy turaqqa qoiylǵan.
Kei jaǵdaida tárkilengen múlik qaryzdyń ornyna óndirip alýshy tarapqa berilse, endi biri aýktsionǵa shyǵarylǵan. Máselen, bir boryshkerdiń avtokóligi 1,4 mln teńge bereshektiń bir bóligin óteý úshin talap qoiýshyǵa tabystaldy. Al Aqsý qalasynda 1,3 mln teńge aliment qaryzy bar azamattyń kóligi saýdaǵa qoiyldy. Sonymen qatar jalpy quny 12,8 mln teńge bolatyn úsh jyljymaityn múlik óndirip alýshylardyń ieligine ótti.
Tekserý kezinde izdeýde júrgen 14 boryshkerdiń mekenjaiy anyqtalǵan. Solardyń biri balalaryna 9 mln teńge qaryz bolyp shyqty. Prokýratýra aralasqannan keiin er adam bereshegin tolyq ótegen.
Qadaǵalaý organy aliment tólemeýshilerdi izdestirý sharalarynyń kei jaǵdaida tek qaǵaz júzinde júrgizilgenin de anyqtady. Mundai zańbuzýshylyq 404 boryshker qamtylǵan 148 atqarýshylyq is júrgizý materialynan tabylǵan.
Buǵan qosa, balalaryna aliment tólemei júrgen keibir azamattardyń qarajatyn qumar oiyndarǵa jumsaǵany belgili boldy.
Qabyldanǵan sharalardyń nátijesinde 225 adam ákimshilik jaýapqa tartylyp, 24 boryshkerge qatysty qylmystyq is qozǵaldy.