پاۆلودار وبلىسىندا جىل باسىنان بەرٸ بورىشكەرلەردەن 5 ملرد تەڭگەدەن استام اليمەنت ٶندٸرٸلدٸ. بالالارى الدىنداعى مٸندەتٸن ورىنداماعان ازاماتتاردىڭ كٶلٸگٸ مەن جىلجىمايتىن مٷلكٸ تەركٸلەنٸپ, بٸرقاتارى ەكٸمشٸلٸك جەنە قىلمىستىق جاۋاپقا تارتىلدى, دەپ حابارلايدى dalanews.kz.
بەرەشەكتٸ ٶندٸرٸپ الۋ جۇمىستارىنا پروكۋراتۋرا, پوليتسييا, سوت ورىنداۋشىلارى جەنە جۇمىسپەن قامتۋ ورگاندارى جۇمىلدىرىلعان. وسى كەزەڭدە اليمەنتتەن بٶلەك, بيۋدجەتكە 1 ملرد تەڭگە كٶلەمٸندەگٸ قارىز قايتارىلعان.
بورىشكەرلەردٸ انىقتاۋ ٷشٸن "كيبەر-شەريف" جٷيەسٸ دە پايدالانىلعان. وعان اليمەنت تٶلەمەگەن ازاماتتارعا تيەسٸلٸ 300-دەن استام كٶلٸك ەنگٸزٸلٸپ, سونىڭ 67-سٸ ارنايى تۇراققا قويىلعان.
كەي جاعدايدا تەركٸلەنگەن مٷلٸك قارىزدىڭ ورنىنا ٶندٸرٸپ الۋشى تاراپقا بەرٸلسە, ەندٸ بٸرٸ اۋكتسيونعا شىعارىلعان. مەسەلەن, بٸر بورىشكەردٸڭ اۆتوكٶلٸگٸ 1,4 ملن تەڭگە بەرەشەكتٸڭ بٸر بٶلٸگٸن ٶتەۋ ٷشٸن تالاپ قويۋشىعا تابىستالدى. ال اقسۋ قالاسىندا 1,3 ملن تەڭگە اليمەنت قارىزى بار ازاماتتىڭ كٶلٸگٸ ساۋداعا قويىلدى. سونىمەن قاتار جالپى قۇنى 12,8 ملن تەڭگە بولاتىن ٷش جىلجىمايتىن مٷلٸك ٶندٸرٸپ الۋشىلاردىڭ يەلٸگٸنە ٶتتٸ.
تەكسەرۋ كەزٸندە ٸزدەۋدە جٷرگەن 14 بورىشكەردٸڭ مەكەنجايى انىقتالعان. سولاردىڭ بٸرٸ بالالارىنا 9 ملن تەڭگە قارىز بولىپ شىقتى. پروكۋراتۋرا ارالاسقاننان كەيٸن ەر ادام بەرەشەگٸن تولىق ٶتەگەن.
قاداعالاۋ ورگانى اليمەنت تٶلەمەۋشٸلەردٸ ٸزدەستٸرۋ شارالارىنىڭ كەي جاعدايدا تەك قاعاز جٷزٸندە جٷرگٸزٸلگەنٸن دە انىقتادى. مۇنداي زاڭبۇزۋشىلىق 404 بورىشكەر قامتىلعان 148 اتقارۋشىلىق ٸس جٷرگٸزۋ ماتەريالىنان تابىلعان.
بۇعان قوسا, بالالارىنا اليمەنت تٶلەمەي جٷرگەن كەيبٸر ازاماتتاردىڭ قاراجاتىن قۇمار ويىندارعا جۇمساعانى بەلگٸلٸ بولدى.
قابىلدانعان شارالاردىڭ نەتيجەسٸندە 225 ادام ەكٸمشٸلٸك جاۋاپقا تارتىلىپ, 24 بورىشكەرگە قاتىستى قىلمىستىق ٸس قوزعالدى.