Almaty oblysy Talǵar aýdanyna qarasty Elaman aýylynyń turǵyndary Memleket basshysy Qasym-Jomart Toqaevqa ashyq úndeý joldap, 2012 jyly sibir jarasyna (kúidirgige) bailanysty rásimdelgen memlekettik aktiniń zańdylyǵy men ǵylymi negizin qaita qaraýdy surady, dep habarlaidy dalanews.kz.
Úndeýde turǵyndar Memleket basshysynyń "Ádiletti Qazaqstan" qaǵidatyn júzege asyryp, zań ústemdigin qamtamasyz etý, azamattardyń quqyqtary men zańdy múddelerin qorǵaý baǵytynda turaqty jumys júrgizip kele jatqanyn atap ótken.
"Biz, Almaty oblysy, Talǵar aýdany, Elaman aýylynyń turǵyndary, Qazaqstan Respýblikasynyń azamattary retinde Sizge zor úmit artyp, elimizdiń Konstitýtsiiasynda kepildik berilgen quqyqtarymyzdy qorǵaý maqsatynda osy úndeýdi joldap otyrmyz. Kóp jyldan beri sheshimin tappai kele jatqan máselemizge nazar aýdaryp, zań aiasynda ádil sheshim qabyldanýyna yqpal etedi dep senemiz", – delingen úndeýde.
Turǵyndardyń aitýynsha, 2012 jyly Elaman aýylynyń bir bóliginde sibir jarasyna bailanysty memlekettik akt rásimdelgen. Alaida osy sheshimniń qabyldanýyna naqty ǵylymi dálelder men tolyqqandy zerthanalyq saraptamalar emes, sol kezeńdegi aýyzsha málimetter men boljamdar negiz bolǵan degen kúmán turǵyndar arasynda áli kúnge deiin saqtalyp keledi.
Olar eger bul aýmaqta shynymen sibir jarasynyń qaýipti oshaǵy bolǵan jaǵdaida, memleket munda turǵyn úi qurylysyna jer bólmei, halyqtyń turaqty qonystanýyna ruqsat bermes edi dep esepteidi. Óitkeni keiingi jyldary bul aýmaqta turǵyn úiler salynyp, mektep paidalanýǵa berilgen, jol, elektr, aýyz sý jáne gaz jelileri tartylǵan.
"Alaida is júzinde memleket tarapynan azamattarǵa zańdy túrde jer telimderi berildi, turǵyn úiler salyndy, mektep paidalanýǵa berildi, avtomobil joldary tóseldi, elektr jelileri tartyldy, aýyz sý júiesi júrgizildi, tabiǵi gaz jetkizildi jáne basqa da injenerlik-kommýnikatsiialyq infraqurylym tolyq qalyptastyryldy. Bul óz kezeginde atalǵan aýmaqtyń tolyqqandy eldi meken retinde qarastyrylǵanyn jáne memleket tarapynan igerýge jaramdy dep tanylǵanyn kórsetedi", – deidi úndeý avtorlary.
Soǵan qaramastan, turǵyndardyń sózinshe, búgingi kúni 2012 jylǵy memlekettik aktiniń saldarynan kóptegen azamat ózderiniń múliktik quqyqtaryn tolyq kólemde paidalana almai otyr. Atap aitqanda, jer telimderin zańdastyrý, jyljymaityn múlikti rásimdeý, qurylys júrgizý, investitsiia tartý, múlikti kepilge qoiý nemese satý barysynda túrli quqyqtyq jáne ákimshilik kedergiler týyndap keledi.
Turǵyndar munyń saldarynan azamattardyń Konstitýtsiiamen kepildik berilgen quqyqtary men zańdy múddelerine nuqsan kelip otyrǵanyn aitady.
Sonymen qatar úndeýde osy ýaqytqa deiin atalǵan aýmaqtyń naqty sanitariialyq-epidemiologiialyq jaǵdaiyna zamanaýi ǵylymi ádistermen keshendi zertteý júrgizilgeni týraly halyqqa resmi ári tolyq aqparat usynylmaǵany atap ótilgen.
"Ǵylym men zerthanalyq diagnostikanyń qazirgi múmkindikteri qaýipti infektsiialardyń bar-joǵyn dál anyqtaýǵa múmkindik beredi. Sondyqtan máseleni tek burynǵy qujattarǵa ǵana súienip emes, qazirgi ǵylymi talaptarǵa sáikes qaita qaraý qajet dep sanaimyz", – delingen úndeýde.
Osyǵan bailanysty Elaman aýylynyń turǵyndary Prezidentten birqatar naqty shara qabyldaýdy surady.
Atap aitqanda, olar 2012 jyly Elaman aýmaǵynda sibir jarasyna bailanysty memlekettik aktiniń qandai negizdermen qabyldanǵanyn jan-jaqty ári táýelsiz tekserýdi, sol kezdegi barlyq arhivtik materialdarǵa, sanitariialyq qujattarǵa, veterinariialyq derekterge jáne zerthanalyq qorytyndylarǵa quqyqtyq baǵa berýdi ótingen.
Sondai-aq qajet bolǵan jaǵdaida Qazaqstannyń jetekshi ǵylymi-zertteý uiymdary men táýelsiz sarapshylardy tarta otyryp, qazirgi zamanǵy ǵylymi jáne zerthanalyq zertteýler uiymdastyrýdy suraǵan.
Budan bólek, eger júrgizilgen tekserýler nátijesinde atalǵan shekteýlerdiń jetkilikti ǵylymi nemese quqyqtyq negizi joq ekeni anyqtalsa, olardy zańnama talaptaryna sáikes alyp tastaýdy, sondai-aq Elaman aýyly turǵyndarynyń buzylǵan quqyqtaryn qalpyna keltirý jáne máseleni qoldanystaǵy zańnama aiasynda ádil sheshý úshin ýákiletti memlekettik organdarǵa naqty tapsyrmalar berýdi ótingen.
Úndeý sońynda turǵyndar olardyń maqsaty qandai da bir memlekettik organdy aiyptaý emes ekenin erekshe atap ótken.
"Bizdiń maqsatymyz – qandai da bir memlekettik organdy aiyptaý emes. Biz tek kóp jyldan beri turǵyndardy alańdatyp kele jatqan máseleniń aqiqatyn anyqtap, onyń ǵylymi, quqyqtyq jáne zańdy turǵydan ádil baǵalanýyn qalaimyz. Eger qaýip rasynda bar bolsa, halyq oǵan qatysty tolyq ári naqty aqparat alýǵa tiis. Al eger mundai qaýip ǵylymi turǵydan rastalmasa, onda azamattardyń quqyqtaryn shekteitin negizsiz kedergiler joiylyp, tarihi ádilettilik qalpyna keltirilýi qajet", – deidi aýyl turǵyndary.
Sóz sońynda úndeý avtorlary Memleket basshysynyń ádildik qaǵidattaryn berik ustanatynyna jáne «Halyq únine qulaq asatyn memleket» tujyrymdamasyn iske asyrý baǵytyndaǵy jumysyna senim bildirip, Elaman aýyly turǵyndarynyń ótinishi zań talaptaryna sai ashyq, obektivti ári ádil qaralady degen úmitin jetkizgen.
"Biz Sizdiń ádildik qaǵidattaryn berik ustanatynyńyzǵa jáne halyqtyń únin estitin memleket tujyrymdamasyn júzege asyrý jolyndaǵy ustanymyńyzǵa senim bildiremiz. Sondyqtan Elaman aýyly turǵyndarynyń osy ótinishine erekshe nazar aýdaryp, máseleniń zań talaptaryna sai, ashyq, obektivti jáne ádil qaralýyna yqpal etedi dep úmittenemiz", - dep qorytyndylaǵan úndeý avtorlary.
