Abai oblysynyń turǵyny júrgizýshi kýáligin aýystyrmaq bolyp, kútpegen jerden psihiatriialyq esepte turǵanyn anyqtaǵan. Er adam bul týraly memlekettik qyzmetter portaly arqyly qujat rásimdeý kezinde bilgen, dep habarlaidy dalanews.kz.
Osydan keiin ol aýrýhana men densaýlyq saqtaý basqarmasyn sotqa berip, ózin psihiatriialyq esepke qoiýdy zańsyz dep tanýdy jáne Ulttyq psihikalyq aýrýlar tirkeliminen málimetterin óshirýdi talap etti.
Sottyń óńirlik baspasóz qyzmetiniń málimetinshe, meditsinalyq mekeme komissiiasy azamattyń derekteri tirkelimge qate engizilgen degen qorytyndyǵa kelgen.
– Komissiia qorytyndysy boiynsha, adam tolyqqandy meditsinalyq tekserýsiz jáne dispanserlik baqylaý tártibin buza otyryp esepke qoiylǵan, – dep habarlady sottyń baspasóz qyzmeti.
Alaida meditsinalyq mekeme qateni anyqtaǵanymen, júieden jazbany birden óshirý múmkin bolmaǵan. Óitkeni ýákiletti organ aýrýhananyń ótinishin qaraýsyz qaldyrǵan.
Sot barysynda talapkerdiń ambýlatoriialyq kartasy saqtaý merzimi ótýine bailanysty joiylǵany da belgili boldy. Biraq kartanyń joiylǵanyn rastaityn akt usynylmaǵan.
Óz kezeginde densaýlyq saqtaý basqarmasy azamattyń derekterin óshirý úshin dárigerlik-konsýltatsiialyq komissiiadan ótýi qajet ekenin aitqan. Alaida sot bul ýájben kelispedi.
– Jaýapkerler er adamnyń psihiatriialyq kómekke óz erkimen júgingenin, tiisti meditsinalyq tekserýden ótkenin, klinikalyq baqylaýda bolǵanyn nemese mundai kómek kórsetýge kelisim bergenin dáleldei almady, – delingen sot aqparatynda.
Nátijesinde sot talap aryzdy qanaǵattandyryp, aýrýhana men densaýlyq saqtaý basqarmasyna azamat týraly málimetterdi Ulttyq psihikalyq aýrýlar tirkeliminen alyp tastaýdy mindettedi.
