KTK telearnasy 2025 jyldyń qorytyndysy boiynsha shyǵynǵa ushyrady. Osyǵan bailanysty kompaniianyń iri aktsionerleriniń biri sanalatyn Nursultan Nazarbaev qoryna taǵy da dividend tólenbeidi, dep dalanews.kz tilshisi kznews.kz saityna silteme jasap habarlaidy.
Bul málimet Qarjylyq eseptilik depozitariiine joldanǵan qujatta kórsetilgen. Onda aktsionerlerdiń 28 mamyrda ótken jinalysynda qabyldaǵan sheshimderi jazylǵan.
Qujatqa sáikes, kompaniia aktsionerleri 2025 jyl shyǵynmen aiaqtalǵandyqtan, taza tabysty bólmeý jóninde sheshim qabyldaǵan. Osyǵan bailanysty KTK-nyń jai aktsiialary boiynsha dividend tóleý toqtatyldy.
Aita keteiik, telearna 2022, 2023 jáne 2024 jyldardyń qorytyndysy boiynsha da jai aktsiialar boiynsha dividend tólemegen.
Sondai-aq 2025 jyldyń nátijesine bailanysty Direktorlar keńesiniń músheleri, bas direktor jáne basqarma quramyndaǵy tulǵalar da syiaqy almaidy.
Tólem tek basymdyqqa ie aktsiialar boiynsha jasalady. Bul qarajat buryn jinaqtalǵan qor esebinen bólinedi. Bir aktsiiaǵa 100 teńgeden eseptelgen. Kompaniia jarǵysyna sáikes, mundai 500 aktsiia bar. Iaǵni tólemniń jalpy somasy 50 myń teńgeni quraidy.
Aktsionerler jinalysynda aýditorlyq uiymdy aýystyrý máselesi de qaralǵan. KTK-nyń 2026-2028 jyldarǵa arnalǵan qarjylyq esebin tekserý «Kaz Audit Finance» kompaniiasyna tapsyryldy. Sonymen birge Esep komissiiasynyń quramy jańartylyp, oǵan úsh jańa maman engizildi.
Egov deregine sáikes, KTK telearnasynyń 105 quryltaishysy bar.
Qarjylyq eseptilik depozitariii saitynda kompaniianyń 2025 jylǵy qarjylyq esebi ázirge jariialanbaǵan. Al buǵan deiingi esepterge qaraǵanda, 2024 jyl telearna úshin tabysty bolǵan. Eki jyl buryn KTK-nyń taza paidasy 67,4 mln teńgeni, al 2023 jylǵy tabysy 64,9 mln teńgeni quraǵan.
Kompaniianyń taýarlar men qyzmetterdi ótkizýden túsken tabysy 5,7 mlrd teńge bolǵan. Kórsetilgen qyzmetterdiń ózindik quny 4,7 mlrd teńgege jetip, jalpy tabys 970,2 mln teńgeni quraǵan. Salyq tóleýge deiingi paida 94,9 mln teńge bolǵan.
Nursultan Nazarbaev qory 2000 jyly qurylǵan. Qor daryndy jastardy qoldaý, áleýmettik jobalar men azamattyq bastamalardy damytý, sondai-aq saraptamalyq-taldaý baǵytyndaǵy jumystardy ilgeriletýmen ainalysady.
