كتك تەلەارناسى 2025 جىلدىڭ قورىتىندىسى بويىنشا شىعىنعا ۇشىرادى. وسىعان بايلانىستى كومپانييانىڭ ٸرٸ اكتسيونەرلەرٸنٸڭ بٸرٸ سانالاتىن نۇرسۇلتان نازارباەۆ قورىنا تاعى دا ديۆيدەند تٶلەنبەيدٸ, دەپ dalanews.kz تٸلشٸسٸ kznews.kz سايتىنا سٸلتەمە جاساپ حابارلايدى.
بۇل مەلٸمەت قارجىلىق ەسەپتٸلٸك دەپوزيتارييٸنە جولدانعان قۇجاتتا كٶرسەتٸلگەن. وندا اكتسيونەرلەردٸڭ 28 مامىردا ٶتكەن جينالىسىندا قابىلداعان شەشٸمدەرٸ جازىلعان.
قۇجاتقا سەيكەس, كومپانييا اكتسيونەرلەرٸ 2025 جىل شىعىنمەن اياقتالعاندىقتان, تازا تابىستى بٶلمەۋ جٶنٸندە شەشٸم قابىلداعان. وسىعان بايلانىستى كتك-نىڭ جاي اكتسييالارى بويىنشا ديۆيدەند تٶلەۋ توقتاتىلدى.
ايتا كەتەيٸك, تەلەارنا 2022, 2023 جەنە 2024 جىلداردىڭ قورىتىندىسى بويىنشا دا جاي اكتسييالار بويىنشا ديۆيدەند تٶلەمەگەن.
سونداي-اق 2025 جىلدىڭ نەتيجەسٸنە بايلانىستى ديرەكتورلار كەڭەسٸنٸڭ مٷشەلەرٸ, باس ديرەكتور جەنە باسقارما قۇرامىنداعى تۇلعالار دا سىياقى المايدى.
تٶلەم تەك باسىمدىققا يە اكتسييالار بويىنشا جاسالادى. بۇل قاراجات بۇرىن جيناقتالعان قور ەسەبٸنەن بٶلٸنەدٸ. بٸر اكتسيياعا 100 تەڭگەدەن ەسەپتەلگەن. كومپانييا جارعىسىنا سەيكەس, مۇنداي 500 اكتسييا بار. ياعني تٶلەمنٸڭ جالپى سوماسى 50 مىڭ تەڭگەنٸ قۇرايدى.
اكتسيونەرلەر جينالىسىندا اۋديتورلىق ۇيىمدى اۋىستىرۋ مەسەلەسٸ دە قارالعان. كتك-نىڭ 2026-2028 جىلدارعا ارنالعان قارجىلىق ەسەبٸن تەكسەرۋ «Kaz Audit Finance» كومپانيياسىنا تاپسىرىلدى. سونىمەن بٸرگە ەسەپ كوميسسيياسىنىڭ قۇرامى جاڭارتىلىپ, وعان ٷش جاڭا مامان ەنگٸزٸلدٸ.
Egov دەرەگٸنە سەيكەس, كتك تەلەارناسىنىڭ 105 قۇرىلتايشىسى بار.
قارجىلىق ەسەپتٸلٸك دەپوزيتارييٸ سايتىندا كومپانييانىڭ 2025 جىلعى قارجىلىق ەسەبٸ ەزٸرگە جارييالانباعان. ال بۇعان دەيٸنگٸ ەسەپتەرگە قاراعاندا, 2024 جىل تەلەارنا ٷشٸن تابىستى بولعان. ەكٸ جىل بۇرىن كتك-نىڭ تازا پايداسى 67,4 ملن تەڭگەنٸ, ال 2023 جىلعى تابىسى 64,9 ملن تەڭگەنٸ قۇراعان.
كومپانييانىڭ تاۋارلار مەن قىزمەتتەردٸ ٶتكٸزۋدەن تٷسكەن تابىسى 5,7 ملرد تەڭگە بولعان. كٶرسەتٸلگەن قىزمەتتەردٸڭ ٶزٸندٸك قۇنى 4,7 ملرد تەڭگەگە جەتٸپ, جالپى تابىس 970,2 ملن تەڭگەنٸ قۇراعان. سالىق تٶلەۋگە دەيٸنگٸ پايدا 94,9 ملن تەڭگە بولعان.
نۇرسۇلتان نازارباەۆ قورى 2000 جىلى قۇرىلعان. قور دارىندى جاستاردى قولداۋ, ەلەۋمەتتٸك جوبالار مەن ازاماتتىق باستامالاردى دامىتۋ, سونداي-اق ساراپتامالىق-تالداۋ باعىتىنداعى جۇمىستاردى ٸلگەرٸلەتۋمەن اينالىسادى.
