Kseniia Balabaeva – rapidten álem chempiony!

Kseniia Balabaeva 2025 jyly 20 jasqa deiingi jasóspirimder arasynda ótken rapid boiynsha álem chempionatynda jeńiske jetti. Týrnir Perý astanasy Limada ótip jatyr, dep habarlaidy Dalanews.kz

19 jastaǵy almatylyq shahmatshy 9 týrdan keiin 7 upai jinady. Jarys shveitsar júiesi boiynsha 15+10 ýaqyt baqylaýymen (ár oiynǵa 15 minýt jáne ár júriske 10 sekýnd qosylady) ótkizildi. Balabaeva eki kúnnen keiin 5 upaimen kósh bastap turǵan. Jarystyń sońǵy kúnin Kseniia 47-shi júriste mat qoiǵan Ýmida Omonovany jeńýmen bastady. Keiin Anna Jýrova jáne Afrýza Hamdamovamen senimdi teń oinap, 1-shi oryndy aldyn ala qamtamasyz etti.

Kseniia Balabaeva – 2024 jyly Býdapeshtte ótken shahmat olimpiadasynda kúmis alǵan Qazaqstannyń eresekter arasyndaǵy áielder quramasynyń múshesi. Qazaqstan namysyn bul chempionatta sondai-aq Liia Qurmanǵalieva men Ámina Qaiyrbekova qorǵady. Amina 6 upai jinap 7-shi orynǵa ie bolsa, Liia 5 upaimen 12-shi orynda márege jetti.

2025 jylǵy álem chempionaty (rapid, G20)

1. WGM Kseniia Balabaeva (2287) – 7 upai;
2. WIM Afrýza Hamdamova (2384, Ózbekstan) – 6½;
3. WFM Varvara Poliakova (2065, FIDE) – 6½;
4. WFM Anna Jýrova (2189, FIDE) – 6½;
5. WIM Ýmida Omonova (2265, Ózbekstan) – 6;
6. FM Fiorella Kontreras Ýaman (2152, Perý) – 6;
7. WIM Ámina Qaiyrbekova (2259) – 6;
8. IM Eline Riobers (2409, Niderlandy) – 6;
9. WGM Liia Qurmanǵalieva (2150) – 5.

Jigitter arasynda sońǵy kúnniń aldynda Ózbekstannan shyqqan úsh shahmatshy – grossmeister (GM) Mýhiddin Madaminov, halyqaralyq sheberler (IM) Hýmoiýn Begmýratov jáne Mýhammadzohid Sýiarov kósh bastap turǵan. 16 jastaǵy Sýiarov rapid boiynsha álem chempiony atandy.

2025 jylǵy álem chempionaty (rapid, O20):

1. IM Mýhammadzohid Sýiarov (2372, Ózbekstan) –7½ upai;
2. GM Mýhiddin Madaminov (2458, Ózbekstan) – 7;
3. GM Denis Lazavik (2579, Belarýs) – 7;
4. IM Likael Roderik Tikona Rokabado (2367, Boliviia) – 7;
5. IM Aarav Dengla (2172, Úndistan) – 7.

26 qyrkúiek – demalys kúni. 27–28 qyrkúiekte blits boiynsha (3+2 formaty: partiiaǵa 3 minýt jáne ár júriske 2 sekýnd qosylady) 9 týr shveitsar júiesimen ótedi.

Eske salaiyq, 2024 jyly tamyz aiynda Ózbekstan astanasy Tashkentte ótken jasóspirimder arasyndaǵy (U20) rapid pen blitsten álem chempionatynda rapid boiynsha álem chempiondary Maksim Tsarýk (FIDE/Belarýs) pen Aleksandra Tarasenko (FIDE/Belarýs) atansa, blitste Denis Lazavik (FIDE/Belarýs) pen Tarasenko jeńimpaz boldy. Qazaqstandyq shahmatshylar júldegerler qataryna kirmedi.