كسەنيا بالابايەۆا 2025 جىلى 20 جاسقا دەيىنگى جاسوسپىرىمدەر اراسىندا وتكەن راپيد بويىنشا الەم چەمپيوناتىندا جەڭىسكە جەتتى. تۋرنير پەرۋ استاناسى ليمادا ءوتىپ جاتىر، دەپ حابارلايدى Dalanews.kz
19 جاستاعى الماتىلىق شاحماتشى 9 تۋردان كەيىن 7 ۇپاي جينادى. جارىس شۆەيسار جۇيەسى بويىنشا 15+10 ۋاقىت باقىلاۋىمەن (ءار ويىنعا 15 مينۋت جانە ءار جۇرىسكە 10 سەكۋند قوسىلادى) وتكىزىلدى. بالابايەۆا ەكى كۇننەن كەيىن 5 ۇپايمەن كوش باستاپ تۇرعان. جارىستىڭ سوڭعى كۇنىن كسەنيا 47ء-شى جۇرىستە مات قويعان ۋميدا ومونوۆانى جەڭۋمەن باستادى. كەيىن اننا جۋروۆا جانە افرۋزا حامداموۆامەن سەنىمدى تەڭ ويناپ، 1ء-شى ورىندى الدىن الا قامتاماسىز ەتتى.
كسەنيا بالابايەۆا – 2024 جىلى بۋداپەشتتە وتكەن شاحمات وليمپياداسىندا كۇمىس العان قازاقستاننىڭ ەرەسەكتەر اراسىنداعى ايەلدەر قۇراماسىنىڭ مۇشەسى. قازاقستان نامىسىن بۇل چەمپيوناتتا سونداي-اق ليا قۇرمانعالييەۆا مەن ءامينا قايىربەكوۆا قورعادى. امينا 6 ۇپاي جيناپ 7ء-شى ورىنعا يە بولسا، ليا 5 ۇپايمەن 12ء-شى ورىندا مارەگە جەتتى.
2025 جىلعى الەم چەمپيوناتى (راپيد، G20)
- WGM كسەنيا بالابايەۆا (2287) – 7 ۇپاي؛
- WIM افرۋزا حامداموۆا (2384، وزبەكستان) – 6½؛
- WFM ۆارۆارا پولياكوۆا (2065، FIDE) – 6½؛
- WFM اننا جۋروۆا (2189، FIDE) – 6½؛
- WIM ۋميدا ومونوۆا (2265، وزبەكستان) – 6؛
- FM فيورەللا كونترەراس ۋامان (2152، پەرۋ) – 6؛
- WIM ءامينا قايىربەكوۆا (2259) – 6؛
- IM ەلينە روبەرس (2409، نيدەرلاندى) – 6؛
- WGM ليا قۇرمانعالييەۆا (2150) – 5.
جىگىتتەر اراسىندا سوڭعى كۇننىڭ الدىندا وزبەكستاننان شىققان ءۇش شاحماتشى – گروسسمەيستەر (GM) مۋحيددين مادامينوۆ، حالىقارالىق شەبەرلەر (IM) حۋمويۋن بەگمۋراتوۆ جانە مۋحاممادزوحيد سۋياروۆ كوش باستاپ تۇرعان. 16 جاستاعى سۋياروۆ راپيد بويىنشا الەم چەمپيونى اتاندى.
2025 جىلعى الەم چەمپيوناتى (راپيد، O20):
- IM مۋحاممادزوحيد سۋياروۆ (2372، وزبەكستان) –7½ ۇپاي؛
- GM مۋحيددين مادامينوۆ (2458، وزبەكستان) – 7؛
- GM دەنيس لازاۆيك (2579، بەلارۋس) – 7؛
- IM ليكاەل رودەريك تيكونا روكابادو (2367، بوليۆيا) – 7؛
- IM ااراۆ دەنگلا (2172، ءۇندىستان) – 7.
26 قىركۇيەك – دەمالىس كۇنى. 27–28 قىركۇيەكتە بليس بويىنشا (3+2 فورماتى: پارتياعا 3 مينۋت جانە ءار جۇرىسكە 2 سەكۋند قوسىلادى) 9 تۋر شۆەيسار جۇيەسىمەن وتەدى.
ەسكە سالايىق، 2024 جىلى تامىز ايىندا وزبەكستان استاناسى تاشكەنتتە وتكەن جاسوسپىرىمدەر اراسىنداعى (U20) راپيد پەن بليستەن الەم چەمپيوناتىندا راپيد بويىنشا الەم چەمپيوندارى ماكسيم سارۋك (FIDE/بەلارۋس) پەن الەكساندرا تاراسەنكو (FIDE/بەلارۋس) اتانسا، بليستە دەنيس لازاۆيك (FIDE/بەلارۋس) پەن تاراسەنكو جەڭىمپاز بولدى. قازاقستاندىق شاحماتشىلار جۇلدەگەرلەر قاتارىنا كىرمەدى.
